"Sabah" Azərbaycan Premyer Liqasının 28-ci turunda səfərdə "Qəbələ" ilə 1:1 hesablı heç-heçə edib.

"Football-plus.az" xəbər verir ki, qarşılaşmadan sonra keçirilən mətbuat konfransında paytaxt təmsilçisinin məşqçisi Artur Olenin jurnalistlərin suallarını cavablandırıb:

- Vacib oyundan öncə heyətin əsasını təşkil edən bir neçə futbolçularımızı itirdik. Bu oyunumuza təsir etdi. Bilirik ki, “Qəbələ” ortada və hücumda yaxşı oynayır. İlk paslarda işimiz alınmadı. Bu oyuna səhvsiz başlamaq lazım idi. Amma biz səhvlər etdik. Bu da oyunumuza təsir etdi. İntizamsızlıq oldu oyunumuzda. Sonradan özümüzdə güc tapıb qolumuzu vurduq. Epizodlarımız var idi, təəssüf ki, ardını gətirə bilmədik.

- “Sabah” avrokuboklardan kənarda qaldı. Mövsümü komanda üçün necə dəyərləndirirsiniz? Yeni mövsüm uğur qazanmaq üçün nələri dəyişmək lazımdı?

- Biz gələndə komanda sonuncu pillədəydi. Müəyyən irəliləyişlər oldu. Yaxşı nəticələr qazandıq. Amma Murad Musayev da deməyib ki, avrokuboklara düşəcəyik. Biz də istəyərdik. Avrokuboklara vəsiqə qazanmaq istəyirdik. Əlimizdən gələni edəcəkdik. Alınmadı. Futbol belədir. İrəliyə addım atdıq, böyük iş gördük. Razıyıq? Yox. Fikrimcə, keyfiyyətli iş gördük.

- Daha da güclənmiş komanda görəcəyik?

- Transfer siyasəti barədə danışmaq istəmirəm. Necə olacağını gələn il görəcəyik.