Yayın ən böyük transfer dastanlarından birində son nöqtənin qoyulması ərəfəsindəyik, hətta bəlkə də siz bu yazını oxuyanda “Tottenhem”in forvardı Harri Keynin “Bavariya”ya keçidi rəsmiləşəcək.

"Football-plus.az" xəbər verir ki, ilk növbədə onu vurğulayaq ki, İngiltərə futbolunun ən böyük ulduzlarından birinin London klubu ilə müqaviləsinin müddəti 2024-cü ilə qədərdi. Son iki gündə bu mövzuda yaşananlara gəlincə, əvvəlcə insayder Santi Anua belə bir xəbər yaydı ki, Keyn tranferinin mövsümün ilk oyununa, yəni avqustun 13-nə qədər tamamlanmasını istəyir. Bununla da onun Londonda qalacağı, yoxsa Münhenə gedəcəyi yönündə tərəddüdlərə birdəfəlik son qoyuldu.

Ardından Almaniyanın ən nüfuzlu nəşrlərindən “Bild” də bəzi detalları açıqladı. Bu qəzet xəbər verir ki, İngiltərə yığmasının 30 yaşlı forvardı artıq londonlulardan Münhendə tibbi baxışdan keçməklə bağlı icazə alıb. Həmçinin “Tottenhem” də “Bavariya”nın 100 + 20 milyon avro (bonuslar şəklində) təklifini qəbul edib. Faktiki yayın ən möhtəşəm keçidlərindən birinin reallaşması yolunda heç bir maneə qalmayıb. İndi “Bavariya” bu keçidlə bağlı sonuncu maliyyə detallarını həll etməlidi. Söhbət vasitəçilərə, agentlərə ödəniləcək puldan və başqa bonuslardan gedir.