Bu yayın iki transfer dastanı var.

“Football-plus.az” xəbər verir ki, bunlardan birinin mərkəzində Kilian Mbappe, o birinin mərkəzində isə Harri Keyn dayanıb. Fransalı ulduzla bağlı az qala hər sayımızda yazırıq. Bəs Keynin mümkün transferi ətrafında durum necədi?

“Bavariya”nın son təklifi də rədd olundu

ESPN-in yaydığı xəbərə görə, “Bavariya”nın bossları forvarda görə sonuncu dəfə 100+20 milyon avro təklif edib və cavab vermək üçün avqustun 5-nə qədər vaxt qoyub. Münhen klubu bildirib ki, təklif təsdiqlənməsə, diqqəti başqa oyunçulara yönəldəcək.

“The Telegraph” güman edir ki, rəhbərliklərin danışığından sonra anlaşma əldə oluna bilər. Düzdü, “Sky Sports”dan Floriant Plettenberq ultimatum variantını təsdiqləmir, yalnız pulun məbləğini xatırladır. Onun dediyinə görə, münhenlilər bir neçə gün də gözləyə bilər, əsas odu ki, iki klubun rəhbərləri arasındakı münasibətlər qarşılıqlı hörmətə əsaslanır. “The Athletic” yazır ki, “Bavariya” Keynin özünə ildə 25 milyon funt maaş vəd edir. Onun maaşı “Tottenhem”dəki ilə müqayisədə iki dəfədən də çox artacaq.

Avqustun 5-də Londondan heç bir cavab gəlmədi. “Bild”in informasıyasına görə, “Tottenhem”in prezidenti Deniel Levi “Bavariya”nn ultimatumunu vecinə almayıb və ailəsi ilə birgə ikihəftəlik məzuniyyətə - Mayamiyə yollanıb. Belə güman olunur ki, o, bu yolla “Bavariya”dan daha səxavətli təklif almaq istəyir.

“Bavariya” 70 milyondan başlamışdı

Hadisələrin inkişaf xronikasına baxaq.

• İyunun sonunda “Bavariya”nın Keynlə danışıq apardığı məlum oldu. Tezliklə Münhen klubunun “Tottenhem”ə ilk təklifi də açıqlandı – 70 milyon avro + bonuslar. İngiltərə klubu imtina etdi.

• “Bavariya” iyulda təklifi bonuslarla yanaşı, 80 milyona qaldırdı. “Tottenhem” bu təklifi də geri çevirdi.

• Sonradan “Daily Mail” açıqladı ki, “Tottenhem” Keyni 140 milyon avroya dəyərləndirir. Belədə “Bavariya”nın qışda bu mövzuya dönə biləcəyi ilə bağlı xəbərlər gəzməyə başladı.

• Almaniya mediasına inansaq, Keyn özü Tomas Tuxellə Çempionlar Liqasını qazanmaq üçün yalnız “Bavariya”ya keçmək istəyir. İngiltərəli ulduz klubla yaxşı münasibətləri qorumaq üçün transferə çıxarılmasını tələb etmək fikrində deyil. İyulun 2-ci yarısında bəlli oldu ki, Keyn “Tottenhem”lə müqavilə müddətini uzatmaq istəməyib. Onun birillik müqaviləsi qalır, 2024-ün yayında artıq klubdan havayı ayrıla bilər. 30 yaşlı futbolçuya görə 100 milyon avro isə heç də aşağı məbləğ deyil.

Bəs başqa klublar niyə müdaxilə etmir?

Belə görünür ki, yeganə real variant “Bavariya” ilə bağlıdı.

• “Mançester Yunayted” çoxdan forvarda maraq göstərir, ancaq “Tottenhem”in prezidenti birbaşa rəqibi gücləndirmək istəmir. Əvvəllər MY-nin yüksək qiymət üzündən Keyndən imtina etdiyi deyilirdisə, iyulun sonunda “The Guardian” yazdı ki, klub hələ bu futbolçunun namizədliyindən vaz keçməyib. Ancaq Ten Haq hücum xəttinə 70 milyon müqabilində Rasmus Heylunnu gətirəndən sonra artıq Keyn variantının üzərindən xəttə çəkmək olar.

• “Real” Keyni gözardı etməsə də belə, prioriteti Kilian Mbappedi. Həm də ingiltərəli hücumçuya görə 116 milyon avro İspaniya klubu üçün nəhəng məbləğdi.

• İyunda PSJ-nin marağı haqda da danışırdılar. Ancaq Keyn özü bu klubla danışıq aparmaq istəmədi. Düzdü, PSJ və “Tottenhem” rəhbərləri arasında müəyyən təmas olub. Guya Keynin xanımı Parisdə daşınmaz əmlakın qiyməti ilə də maraqlanıb.

• Qəfil “Barselona” adı da mediada göründü. Ancaq söhbət yalnız 2024-ün yayında azad agent kimi keçiddən gedir. Hücumda Keynlə Robert Levandovskinin tandemi möhtəşəm görünərdi, eləmi?!

Premyer-liqanın startına cəmi 3 gün qalır. “Tottenhem” “Brentford”a qarşı oyunla başlayır, ardından MY-ni qəbul edir. Amma Keynlə, yoxsa onsuz – çox maraqlıdı.