“İnter Mayami”nin son ev oyunundan sonra qəribə hadisə baş verib.

"Football-plus.az" xəbər verir ki, ulduz futbolçudan bircə xahiş etməsi bir nəfəri yaman peşman edib.

“La Nacion” qəzetinin yaydığı xəbərə görə, özəl şirkətdə təmizlik işlərinə cavabdeh olan Kristian Salamanka ABŞ klubunun ən məşhur futbolçusu Lionel Messidən avtoqraf aldığı üçün işdən qovulub. Salamanka həmin gün avtobusların gəldiyi sektorda olub. Komandanı gətirən avtobus ora yaxınlaşanda Messini gözləyib və ondan avtoqraf istəyib. O, dərhal stadiondan çıxarılıb, sonra isə işdən qovulub.

Kristian bununla bağlı jurnalistlərə belə deyib: “Avtobusların dayandığı sektorda təmizlik işi ilə məşğul idim. Xoşbəxtlikdən avtobus gələndə çöldə idim və bütün futbolçular maşından düşürdülər. Sonuncu düşən Messi idi. Mənə qışqırmağım kifayət etdi. “Hey, dünya çempionu” dedim və o qayıtdı. İş köynəyimin altında Argentina yığmasının forması vardı. Lionel mənə avtoqraf verdi. Sonra təhlükəsizlik işçiləri gəldi, məni bayıra çıxarıb işdən qovdular. Amma buna dəyərdi...”