Konfrans Liqasının oyununda “Partizan”ı qəbul edəcək "Sabah"ın baş məşqçisi Murad Musayev bu gün jurnalistlər önünə çıxdı.

Rusiyalı mütəxəssis əvvəlcə oyunla bağlı fikirlərini bölüşdü:

[b]- Rəqibin üstün və zəif cəhətlərini müəyyənləşdirmisiz?
- Ən üstün cəhətləri sürətli hücumlardı. Orta sahədə çox yığcam oynayırlar və topu ələ keçirən kimi sürətli hücum qururlar. Hücumda ustalıq səviyyəsi yüksək olan futbolçular yer alıb. Təcrübəli və çevik oyunçuları var ki, bu da onların oyununa təsirini göstərir. Komandada anlaşma da yüksək səviyyədədi. Rəqibin zəif tərəfini isə qeyd etmək istəmirəm. Bu etik cəhətdən düzgün olmaz.

- “Partizan”ın heyətində sizə tanış hücumçu var. Söhbət “Neftçi”nin sabiq forvardı Mateus Saldanyadan gedir. Komandaya yenicə qoşulsa da, artıq hesabına qollar yazdıra bilib. Yəqin ki, onu “bağlamağın” yolunu bilirsiz...
- Mateus Serbiya klubuna yeni keçib və deməzdim ki, komandanın əsas oyunçularından biridi. Bəli, meydana çıxdığı iki oyunda yaxşı təsir bağışlayıb, qollar vurub. Sanki xeyli vaxtdı “Partizan”da çıxış edir. Görünür ki, artıq uyğunlaşma prosesini geridə qoyub. Biz onu tanıyırıq. Ancaq “Partizan”ın gücü komanda oyunundadı.

- Coy-Lens Mikels “Partizan”la oyunda meydana çıxacaq?
- 10 dəqiqə əvvəl bizə yaxınlaşıb başqa komandaya keçmək istədiyini bildirdi...

- Futbolçu açıqlamasında “Sabah” maaşımı qaldıracağı halda komandada qala bilərəm” deyib. Siz onunla bu barədə söhbət etmisiz?
- Yayılan müxtəlif söz-söhbətə münasibət bildirmək istəmirəm. Bacardığım qədər onun qərarına təsir etməyə çalışdım. Bundan artıq heç nə edə bilmərəm. Siz dediyiniz məsələyə gəlincə, bu barədə rəhbərlikdən kimsə danışmalıdı. Mən indi “Partizan” barədə düşünməliyəm.

- “Partizan”la matçda onun xidmətindən yararlanmağı düşünürsüz?
- Siz eşitdiz mən nə dedim? O, 10 dəqiqə əvvəl yaxınlaşıb “Partizan”la oyuna meydana çıxmayacağını söylədi. Belədə mən necə onun xidmətindən yararlana bilərəm? Mikelsi zorla oynada bilmərəm ki... Onun müqaviləsində müəyyən məbləğ yazılıb ki, onu ödəyəcəyi halda özü-özünü ala bilər. Klubun bank hesabı var. Ora pul daxil olanda Mikels sənədlərini götürüb gedə bilər. Bu gün üçün hesaba heç nə köçməyib. “Sabah” isə onu satmaq istəmir.

- Komandanız nəyin hesabına sabah “Partizan”ı məğlub edə bilər?
- Aqressiv komanda oyunu, özünəinam və azarkeş dəstəyi sayəsində uğur qazana bilərik. Bir də matçın müəyyən hissələrində diqqətli olmalıyıq. Bəli, “Partizan” çox güclü komandadı, ancaq mən “Sabah”a və futbolçularıma inanıram. Çətin olacaq, amma biz bunu bacaracağıq.

ABDULLA İSMAYILOĞLU