Birinci divizionun son turunda "İmişli" gözlənilmədən liderlər qrupunda qərarlaşan "Turan Tovuz-2"ni məğlub etdi. Komanda bununla həm məğlubiyyətsiz oyunlar seriyasını 3-ə çatdırdı, həm də turnir cədvəlinin “zirzəmi”sindən qurtuldu. Bu və başqa mövzular ətrafında "İmişli"nin baş məşqçisi Ruhid Usubovla danışdıq.

- "Turan Tovuz"un əvəzedicilərini məğlub etməklə çempionatda 4-cü qələbənizi qazandız. Matçla bağlı fikirləriniz maraqlıdı.
- Son matçlarımıza nəzər yetirsək, yaxşı performans sərgiləyirik. İki oyun idi uduzmurduq. Uğurlu seriyanı davam etdirmək istəyirdik. Şükürlər olsun, Tovuz təmsilçisini üstələməklə ilk yarını qələbəylə başa vurduq. Həmçinin sevinirik ki, sonuncu pillədən də qurtulduq.

- Amma mövsümə yaxşı başlamamışdız. Sonradan toparlandız, son 3 oyunda isə 7 xal topladız. Mövsümün ilk yarısındakı çıxışı necə qiymətləndirərdiz?
- Çox doğru vurğuladız, mövsümə uğursuz başladıq. Bunun bir çox səbəbi var. İstədiyimiz kimi toplanış keçmədik, yaxşı transferlər gerçəkləşdirmədik, yetərli yoldaşlıq görüşündə gücümüzü sınamadıq. Bu üzdən də komandanı komplektləşdirə bilmədik. Sadalananlarla yanaşı, stadionumuz yararsız oduğundan ev oyunlarını Saatlıda keçirmək məcburiyyətində qaldıq. Uduzduğumuz görüşlərin çoxunda oyun planında yaxşı çıxış etmişik. Sadəcə, sərəncamımızda olan futbolçuların gənc və təcrübəsiz olması, heyətin tam komplektləşməməsi yenilgiləri şərtləndirdi. Məsələn, 3-cü turda səfərdə heyəti və maddi vəziyyəti bizdən üstün olan MOİK-lə qarşılaşmada ən yaxşı oyunlarımızdan birini keçirdik. İlk yarıda 2 qol vuraraq fasiləyə üstün yollandıq. Ümumilikdə 70 dəqiqə üstün idik. Amma son 20 dəqiqədə rəqib əvəzetmələrdən meydana buraxdığı təcrübəli futbolçuların sayəsində 3 qol vurmaqla qalib gəldi. Həmçinin 6-cı turda evdə "Səbail-2"yə oxşar şəkildə məğlub olduq. Yalnız 8-ci turda doğma meydanda "Zaqatala"ya 3:1 hesabıyla qalib gəlməklə məğlubiyyət seriyasına son verdik. Həmin qarşılaşmadan sonra dönüş edərək daha yaxşı çıxış etməyə başladıq. Son 3 oyunda isə 2 qələbə və 1 heç-heçəyə imza atdıq. İmişlidə çoxdan futbol yox idi. Yenidən qurulan komandayıq. Sevindirici haldı ki, bütün çətinliklərə baxmayaraq, futbolçular meydanda əzmkarlıq, xarakter göstərirlər. Bunun nəticəsidi ki, oyundan-oyuna “artırdıq” və rəqiblərə başağrı olduq. Gələcəyə ümidliyik. Qış fasiləsindən yararlanmaqla nöqsanlarımızı aradan qaldırmağa və daha yaxşı çıxış etməyə çalışacağıq.

- Fasilədə transferlər gözlənilir?
- Bəli. Hər mövqeyə bir futbolçu cəlb etməyi düşünürük. Artıq bir neçə futbolçuyla danışıq aparırıq. Əsas narahatlığımız qapı xəttidi. Çalışacağıq ən azı 4 futbolçu transfer edək. Həmçinin İmişlidə və yaxın rayonlarda seleksiya işləri aparırıq. Çalışırıq istedadlı uşaqları üzə çıxaraq. Divizionun tələblərindən biri də gənc futbolçu limitidi. Hazırda hər bir klubda 2002-ci il təvəllüdlü futbolçuların yer alması nəzərdə tutulub. Həm limit, həm də İmişlidə futbolun bünövrəsi üçün maksimum gənc futbolçuların yetişdirilməsində maraqlıyıq.

- Komandanı neçə futbolçu tərk edəcək?
- Maksimum çalışırıq ki, heyəti qoruyaq. Amma 4-5 futbolçunun gedəcəyi gözlənilir.

- Maddi vəziyyətinizin yaxşılaşmaq ehtimalı var?
- Ən böyük problemimiz budu. Ona görə də həm heyəti gücləndirə, həm stadionu təmir etdirib başa çatdıra, həm də başqa zəruri ehtiyacları qarşılaya bilmirik.

- İmişlidə iş adamlarından və İcra Hakimiyyətindən dəstək yoxdu?
- Bizə əsas dəstəyi AFFA verir. İmişlidə iş adamları, demək olar ki, yoxdu. Bütün imkanlı şəxslər Bakıda bina tikməklə məşğuldu. Hamısı da rayonda komandanın bərpa olunmasından xəbərdardı. Başda rəhbərimiz Aqşin müəllim olmaqla hamımız onlara müraciət etmişik, amma yaxın duran olmayıb. İmkanlı şəxslərin futbola marağı yoxdu. Buna rəğmən, Aqşin müəllim hələ də sponsor axtarışındadı. Gələcəkdə yaxşı sponsor tapacağımıza ümid edirik.

- İkinci yarıda məqsəd nə olacaq?
- Heyəti gücləndirməklə daha yaxşı çıxış etmək istəyirik. Stadionumuz da sərəncamımızda olacaq. Düşünürəm ki, doğma publika önündə çıxış etmək futbolçular üçün ayrıca motivasiya olacaq və rəqiblərimizə daha güclü başağrı olacağıq.

ABDULLA İSMAYILOĞLU