"Kəpəz"in gürcüstanlı hücumçusu Mate Kvirkviya "Football-plus.az" saytına müsahibə verib.

- "Neftçi"ni məğlub etdiz. Oyunla bağlı fikirlərini bölüşərdin...
- Tarixi baxımdan əhəmiyyətli oyun idi və yaxşı hazırlaşmışdıq. Mövsümün ilk oyunu həmişə çətin olur. "Neftçi" ilə matç da ağır keçdi. Amma qazandığımız qələbədən məmnunam.

- "Kəpəz"in evdəki 600-cü qolunu vurmaqla klubun tarixinə düşdün. Necə hissdi?
- Xüsusi hissdi. Mənə bu tarixi klubda oynamağa şans yaratdıqları üçün rəhbərliyə, məşqçi heyətinə, dəstəyə görə isə azarkeşlərə təşəkkür edirəm. Bu nəticə ilə kifayətlənməyəcəyik. İrəli getmək istəyirik.

- İkinci hissədə rəqib qapısı qarşısında qol şanslarınız oldu. Lakin dəyərləndirə bilmədiz. Səbəb nə idi?
- Mən özüm xəsis oyunçu deyiləm və boş olan komanda yoldaşlarımın da fərqlənməsi üçün şərait yaradıram. Matç ərzində belə şanslar yaratmağımız yaxşıdı. Çalışacağıq ki, əlimizə düşən fürsətləri dəyərləndirək.

- Növbəti turda "Zirə" ilə qarşılaşacaqsız. Bu komanda ilk oyunda "Qarabağ"ı məğlub etdi. Şansları necə dəyərləndirirsən?
- "Zirə"yə qarşı bizi çətin oyun gözləyir. Amma onlardan qorxmuruq. Qələbə qazanmaq istəyirik.

- Bu mövsüm "Kəpəz"in hədəfləri nədi?
- "Kəpəz" böyük klubdu. Buna görə də yüksək hədəflər üçün mübarizə aparacağıq.

- Yayda Azərbaycandan və xaricdən transfer təklifləri olmuşdu?
- Bəli, təkliflər var idi. Amma "Kəpəz"də qalmağı seçdim. Burda xoşbəxtəm.

CAVİD ƏLİYEV