“Ferrari” pilotu Şarl Leklerlə müqavilə müddətini uzatmaqla bağlı razılığa gəlib.

“Football-plus.az” xəbər verir ki, İtaliya komandası monakolu pilotla “2+3” sxemi üzrə müqavilə bağlayacaq. “Ferrari” digər pilotu, hələ 2024-cü ilin iyununa qədər müqaviləsi olan Karlos Sayns ilə bağlı yekun qərarını verməyib. 2019-cu ildən İtaliya komandasının şərəfini qoruyan Lekler cari mövsümdə 12 mərhələdən sonra 99 xalla şəxsi hesabda 5-ci yerdədi. 25 yaşlı idmançının indiki müqaviləsi gələn ilin iyununa qədər nəzərdə tutulub.

“Formula-1” dünyası ilə bağlı başqa maraqlı xəbərlər də var. “Aston Martin”in pilotu Fernando Alonsonun fikrincə, sabiq komandası “Alpin” onu lazımınca dəyərləndirməyib. O, Fransa komandası ilə müqavilə müddətini uzatmayıb və 2023-cü ildən “Aston Martin”dədi: “Söhbət güman etdiyimdən çox uzandı. Müqavilə müddətinin uzadılması ilə bağlı danışıqlara 2022-ci ildə Avstraliyada başlamışdıq. Hər şey çox ləng irəliləyirdi, özü də mənim günahım üzündən yox. Mən hazır və razı idim. Ancaq son nəticədə yazdıqlarımız kağız üzərində görünmədi. Üstəlik bütün bu yaşla bağlı söhbətlər… “Alpin”in məni dəyərləndirməməsi yüzfaizlik gerçəkdi. Və hələ də dəyərləndirmir”.

İkiqat dünya çempionu “Formula-1”də hansı rolu oynaması haqda da danışıb: “Formula-1” həm içəridə, həm də trassdan kənarda böyük şoudu. Bilirsizmi, rol oynamaq lazımdı. Sənin üçün yazılan rolu. Tarixi danışmaq, nəyin yaxşı, nəyin pis olduğunu anlatmaq lazımdı. İstənilən yarışda, diskussiyada, mübahisədə həmişə yaxşı və pis güc, yaxşı və pis oğlanlar var. Ümumilikdə adamlar və media məni həmişə pis oğlanlar sırasına aid edir. Sanki nəyisə düz etməmişəm. Mən bunun əleyhinə deyiləm. Əsas odu ki, sən hələ də adamlara lazımsan, müqavilənin sonuna nə qədər alması onlar üçün maraqlıdı, istəyirlər ki, sən hələ də çıxış edəsən”.

42 yaşlı pilot cari mövsümdə 12 mərhələdən sonra 149 xalla 3-cü pillədə qərarlaşıb. “Aston Martin” də Mühəndislər kubokunda 196 xalla eyni pillədədi.
İndi “Formula-1” dünyasının kralı Lekler və ya Alonso deyil, Maks Ferstappendi. “Red Bull”un niderlandlı pilotu hazırda özünün yarış komandasını qurmaq üzərində çalışır. O, “Verstappen.com Racing”i GT3 sinfindən olan yarışlar üçün sifariş etməyi planlaşdırır: “Bu layihə hələ təməlqoyma mərhələsindədi, ancaq indidən mənə enerji verir. “Verstappen.com Racing” sponsorluqla məşğul olur və mənə yaxın adamların müxtəli yarış fəallıqlarını dəstəkləyir”.

25 yaşlı niderlandlının planlarına görə, onun kiberidman komandası “Team Redline”nın iştirakçıları GT3 sinfinə keçmək imkanına malik olmalıdılar ki, təkcə virtual yox, real yarışlarda da iştirak edə bilsinlər.