İyulun 28-də Ukrayna çempionatında yeni mövsüm start götürdü.

“Football-plus.az” xəbər verir ki, son mövsümdə 2-ci yeri tutan “Dnepr-1”in “Vorskla” ilə səfər oyunu təxirə salındığından ölkənin avrokuboklardakı başqa təmsilçilərinin çıxışına nəzər salaq. Çempion “Şaxtyor” Patrik van Leuvenin rəhbərliyi altında ilk qələbəsini “Metallist 1925” üzərində qazandı. Hələ fasiləyə qədər çoxlu künc zərbəsi yerinə yetirən “şaxtaçılar” bunların birində, özü də Kaşukun asmasından sonra rəqib qapısına yol tapdı. Ümumiyyətlə, “Sabah”ın sabiq oyunçusu cinah vingeri kimi çox fəal idi. 47-ci dəqiqədə Traore fərqi artırandan sonra faktiki oyunun taleyi həll olundu. Düzdü, 56-cı dəqiqədə Yusov qollardan birinin əvəzini çıxdı. Amma “Şaxtyor” sona qədər oyunun axarına nəzarət etdi.

“Dinamo”nun baş məşqçisi Mirça Luçesku iyulun 29-da 78 yaşını tamamladı. Komandası isə ertəsi onun ad gününə böyükhesablı qələbə “bağışladı”. “Minay” artıq 3-cü dəqiqədə hesabı açsa da, Vanat yarım saatın tamamına qədər iki qol vurdu. Sonda qonaqların gücü tükəndi. Kiyevlilər isə bundan yararlanıb hesabı darmadağın həddinə çatdırdı – 4:1.
Ukraynanın AL-dəki təmsilçisi “Zarya” yeni baş məşqçi Nenad Lalatoviçin rəhbərliyi altında geçirdiyi ilk oyunda gözlənilmədən “Rux”a uduzdu. Hissələr bir-birindən kəskin fərqləndi. İlk yarıda aşkar üstün təsir bağışlanan Luqansk klubu hesabı da açdı. Amma lvovlular fasilədən sonra bunun əvəzini iki qolla çıxdı.

Turun qalan oyunlarına gəlincə, Roman Qriqorçukun çalışdırdığı “Çernomorets” elitanın debütantı LNZ-ni “dişinə vurdu”. Çerkassk klubu mövsümlərarası dövrdə elita təcrübəsinə malik bir neçə futbolçu ilə güclənsə də, xətlərarası əlaqələrin qaydaya salınması üçün hələ vaxta ehtiyac var. “Dənizçilər”in hər hissədə vurduğu bir qol qələbə üçün kifayət etdi.
Yeni mövsüm debütantlardan “Obolon”un “Kolos”u qəbul etməsi ilə start götürdü. Qonaqlar topa nəzarətdəki üstünlüyü heç cür maddiləşdirə bilmədi. Debütdə qazanılan ilk xal “Obolon” düşərgəsini sevindirdi.

Debütantlardan LNZ ilə “Obolon”dan fərqli “Polesye” mövsümə qələbə ilə başladı. Jitomirlilər “Veres”lə oyunda ianmlı qələbəni məzmunlu oyun və bəzi futbolçularının parlaq təsir bağışlaması fonunda qazandı. Konqolu Makuana çox gözəl texnika ilə qələbədə önəmli rol oynadı. Məhz bu oyunda, özü də sona 2 dəqiqə qalmış Ukraynanın ədalətsiz müharibəyə cəlb olunduğu bir daha göründü. Oyun hava həyəcanı siqnalı ilə dayandırıldı. Xoşbəxtlikdən mübarizə tezliklə canlandı və oyunu başa çatdırmaq mümkün oldu. “Polesye” isə az qala 3-cü qolu da vuracaqdı...

Nəhayət, turun son oyununda “Aleksandriya” evdə “Krivbass”a qalib gəldi. Yekun nəticəni Şulyanskinin artıq 4-cü dəqiqədə vurduğu qol həll etdi. Hissənin ortalarına yaxın təşəbbüsü ələ keçirən Krivoy-Roq klubu iki dəfə penaltiyə iddia etsə də, referi Yaroslav Kozık meydan sahiblərini belə sərt şəkildə cəzalandırmağa ehtiyac görmədi. Əksinə, qonaqlar 32-ci dəqiqədə azlıqda qaldı – aşkar kobudluğa yol verən Semotyuk meydandan qovuldu. Bununla da oyunun taleyi həll olundu. Say üstünlüyü qazanan “Aleksandriya” sakitcə oyunu qələbəyə daşıdı.

1-ci tur
Metallist 1925 – Şaxtyor 1:2
Yusov, 56 – Matviyenko, 31. Traore, 47.
Şaxtyor: Riznık, Bondar, Matviyenko, Qoçoleyşvili, Bondarenko, Krıskiv, Traore (Kelsi, 72), Topalov (Pedrinyo, 79), Sikan (Kastilyo, 89), Kaşuk (Neverton, 72), Zubkov.
Dinamo – Minay 4:1
Vanat, 27; 30. Buyalski, 87-p. Karavayev, 90+3 – Vitençuk, 3.
Dinamo: Buşan, Belovar, Popov, Tımçik, Dubinçak, Buyalski, Sidorçuk (Brajko, 82), Yarmolenko (Karavayev, 76), Kabayev (Sirota, 34), Vanat (Benito, 76), Şaparenko (Şepelev, 82).
Rux – Zarya 2:1
Runiç, 67. Klimçuk, 86 – Rusin, 22.
LNZ – Çernomorets 0:2
Boyçuk, 39. Şporn, 65.
Obolon – Kolos 0:0
Veres – Polesye 0:2
Makuana, 2. Budkovski, 38.
Aleksandriya – Krivbass 1:0
Şulyanski, 4.
“Vorskla” – “Dnepr-1” oyunu təxirə salınıb.
Növbəti turun oyunları avqustun 2-6-sı aralığında keçiriləcək: Veres – Şaxtyor, Minay – LNZ, Obolon – Dinamo, Aleksandriya – Metallist 1925, Dnepr-1 – Polesye, Zarya – Krivbass, Kolos – Çernomorets, Rux – Vorskla.