“Şaxtyor” həftə ərzində 2-ci dəfə “Lvov”u məğlub etdi. Lider çərşənbə günü müəyyən çətinlik çəkmişdisə, hesabat turunda bu mənada problem olmadı.

Artıq 7-ci dəqiqədə hesabı açan “şaxtaçılar” topa total nəzarət fonunda 75-ci dəqiqəyə qədər fərqi artıra bilmədi. Məhz həmin dəqiqədə səhnəyə çıxan Bondarenko hesabı 2:0 etdi. “Şaxtyor” “Dnepr-1” ilə xal fərqini 7-yə çatdırdı.

Turun mərkəzi oyununda “Dnepr-1”i qəbul edən “Zarya” qələbə qazanmaqla bu komandaya yaxınlaşdı. 54-58-ci dəqiqələr aralığında iki qol vuran luqansklılar 3-cü uzatma dəqiqəsində rəqibin təsəlli qoluna mane ola bilmədi.

Ukrayna futbolunun iddialılarından “Dinamo”nun böhranı davam edir. Kiyevlilər “Rux”la səfər oyununda hesabı erkən açsalar da, Dovqinin 40-cı dəqiqədəki bərabərlik qolu onları ayıltmadı. Fasilədən sonra “Dinamo” qələbə yolunda canfəşanlıq etmədi. Düzünə qalsa, bu komandanın xal itkiləri artıq Ukraynada sensasiya kimi qəbul olunmur.

Turun qalan oyunlarına gəlincə, “Metallist” – “Veres” oyununda 10 qol vuruldu və bunlardan 7-si ilk yarıya təsadüf etdi. Çempionatın ən sülhsevər iki komandasının - “Metallist 1925” ilə “Aleksandriya”nın duelində qalib müəyyənləşmədi (0:0). Bu iki komandanın hesabında 19 heç-heçə var! Emil Mustafayev qonaqların heyətində 61-ci dəqiqədə meydana çıxdı və heç nə ilə yadda qalmadı.

“Aleksandriya” Ruslan Rotanın rəhbərliyi altında keçirdiyi ardıcıl 6-cı oyundan da heç-heçə ilə ayrıldı.