Ukraynada sona üç tur qalsa da, hələ də çempionun adına aydınlıq gəlməyib. Çempionluğa üç iddialı var və hər biri də qələbələri sıralamaqdadı.

Lider “Şaxtyor” bu tur “Veres” üzərində çətin qələbə qazandı. Qələbə topunu sona 7 dəqiqə qalmış Matviyenko vurdu. 66 xalla zirvədə qərarlaşan “şaxtaçılar” son üç turun ikisində “Zarya” və “Dnepr-1” ilə qarşılaşacaq. Eyni – 2:1 hesablı qələbə qazanan “Dnepr-1” oyunun taleyini sonuncu dəqiqədə həll etdi. Hesabı hissənin sonunda “Kolos” açdı, ancaq 2-ci hissənin əvvəlində çempionatın bombardiri Dovbik bu qolun əvəzini çıxdı. Meydan sahiblərinin üzü bir də 4-cü uzatma dəqiqəsində güldü. Çoxsaylı künc zərbələrindən birindən sonra Sarapi qapıçının səhvindən yararlanıb topu tora göndərdi.

“Şaxtyor”la “Dnepr-1” qədər olmasa da, “Zarya” da çempionluq şansını qoruyur. Luqansk klubu çempionatın yaz hissəsində 11-ci qələbəsini “İnqulets”lə oyunda qazandı. “Zarya”nın növbəti turdakı “Şaxtyor”la oyunu “qızıl”ın taleyini müəyyənləşdirmək baxımından həlledici ola bilər. Hər halda, Luqansk klubu müstəqillik tarixində ilk dəfə ölkə çempionatında bu qədər çox – 61 xal toplayıb.

“Dinamo” uzun fasilədən sonra azarkeşlərini böyükhesablı qələbə, ən əsası inamlı oyun ilə sevindirdi. “Aleksandriya” hissənin sonunda fərqi azaltmaqla ümidlənsə də, kiyevlilər 2-ci yarıda ardıcıl 3 qol vurdu. Yeri gəlmişkən, “Aleksandriya”nın yeganə qolunu əvvəldən sona qədər meydanda olan soydaşımız Emil Mustafayev yaratdı. Məhz o, cinahda Vivçarenkonu arxada qoyandan sonra oyundaşını zərbə mövqeyinə çıxardı.

Turun qalan oyunlarına gəlincə, “Çernomorets” gözlənilmədən evdə “Minay”a uduzdu. “Vorskla” “Krivbass”a qalib gəlməklə son üç turu formallığa çevirdi. Daha doğrusu, bu iki komanda elitada yerini qoruyacaq. Əvəzində ardıcıl 10-cu məğlubiyyətlə barışan “Lvov”un növbəti mövsüm 1-ci liqada oynayacağı dəqiqləşdi. Xarkov derbisində “Metallist 1925”ə uduzan “Metallist” də elitadan getməyə çox yaxındı.

27-ci tur

Şaxtyor – Veres 2:1

Zubkov, 35. Matviyenko, 83 – Şaray, 74.

Şaxtyor: Trubin, Bondar, Qoçoleyşvili, Matviyenko, Rakitski (Mixayliçenko, 87), Stapenanko, Nazarina, Sudakov (Totovitski, 87), Topalov (Krıskov, 65), Zubkov, Sikan (Kelsi, 75).

Dnepr-1 – Kolos 2:1

Dovbik, 56. Sarapi, 90+4 – Myakuşko, 45.

Dnepr-1: Rıbak, Adamyuk (Tançik, 56), Hayner (Pasiç, 74), Svatik, Nazarenki (Mataritta, 46), Pixalenok, Rubçinski (Koqut, 69), Sarapi, Peqlou, Dovbik, Minqo (Babenko, 46).

Aleksandriya – Dinamo 1:5

Siqeyev, 40 – Andriyevski, 17. Vanat, 32. Vivçarenko, 72. Loqinov, 77-öz qapısına. Voloşin, 88.

Dinamo: Perris (Karavayev, 82), Neşeret, Sirota, Tımçik, Dyaçuk, Vivçarenko, Şepelev (Ramadani, 82), Andriyevski, Buyalski, Vanat (Qarmaş, 66), Kabayev (Voloşin, 82).

Zarya – İnqulets 2:0

Brajko, 21-p. Rusin, 81.

Çernomorets – Minay 0:1

Hadida, 61-öz qapısına.

Vorskla – Krivbass 1:0

Stepanyuk, 62.

Metallist 1925 – Metallist 2:0

Bezuqlı, 58. Çiruk, 68.

Rux – Lvov 2:0

Siminin, 76-öz qapısına. Runiç, 84.

1. Şaxtyor 27 20 6 1 62-19 66
2. Dnepr-1 27 20 4 3 59-22 64
3. Zarya 27 19 4 4 59-28 61
4. Dinamo 27 16 5 6 44-24 53
5. Aleksandriya 27 10 12 5 40-35 42
6. Vorskla 27 10 6 11 32-35 36
7. Krivbass 27 10 5 12 22-29 35
8. Kolos 27 9 6 12 22-31 33
9. Metallist 1925 27 6 12 9 22-39 30
10. Çernomorets 27 7 8 12 30-37 29
11. Minay 27 7 8 12 20-29 29
12. İnqulets 27 7 6 14 20-33 27
13. Rux 27 6 9 12 28-36 27
14. Veres 27 7 6 14 32-40 27
15. Metallist 27 5 7 15 26-51 22
16. Lvov 27 3 4 20 18-48 13
Bombardir: Dovbik (Dnepr-1) – 24.

Növbəti turun oyunları mayın 24-25-də keçiriləcək: Dnepr-1 – Vorskla, Kolos – Dinamo, Veres – Aleksandriya, Zarya – Şaxtyor, Minay – Rux, İnqulets – Metallist 1925, Lvov – Çernomorets, Krivbass – Metallist.