Ukraynada ilk 4 pillədə qərarlaşanlardan “Dnepr-1”, “Zarya” və “Dinamo” inamlı qələbə qazandı, “Şaxtyor” isə xal itirdi. “Şaxtaçılar”ın qələbə yürüşünü “Çernomorets” dayandırdı. 2:2 bitən oyunda bütün qollar ilk yarıda vuruldu.

Liderin ən yaxın izləyicisi “Dnepr-1” səfərdə “Metallist-1925”i Dovbikin het-triki sayəsində məğlub etdi. Ukrayna yığmasının oyuna sonradan qoşulan hücumçusu son 20 dəqiqədə üç qol vurdu. Turnir cədvəlinin 3-cü pilləsində qərarlaşan “Zarya” “Rux”u üç cavabsız qolla məğlub etməklə bu komandadan həm də ilk dövrədəki acı məğlubiyyətin (1:3) əvəzini çıxdı. “Dinamo” səfərdə “Lvov”dan üstün oldu və fəxri kürsüyə iddiasını davam etdirir.
Turun qalan oyunlarına gəlincə, Emil Mustafayevin “Aleksandriya”sı “Vorskla” üzərindəki darmadağınla avrokuboklara vəsiqə yolunda inamlı addım atdı. Start heyətinə yer alan soydaşımız 75-ci dəqiqədə əvəzləndi.

“İnqulets” “Minay”la səfər oyununda parlaq geridönüş etdi, cari mövsümdə 7-ci qələbəsini “Veres” üzərində qazanan “Krivbass” 6-cı pilləyə yüksəldi. Turun qolsuz bitən yeganə oyununda “Metallist”lə “Kolos” üz-üzə gəldi. 45-ci dəqiqədə penaltini boşa verən Pryadun xarkovluların qələbəsiz oyunlar seriyasının 12-yə çatmasına səbəbkar oldu.