Konfrans Liqasında 2-ci təsnifat mərhələsinə yekun vurulacaq.

“Football-plus.az” xəbər verir ki, “Neftçi” “Jelezniçar”ı qəbul edəcək. Matçdan öncə “ağ-qaralar”ın baş məşqçisi Adrian Mutunun mətbuat konfransı keçirilib. Sizi mütəxəssisin fikirləri ilə tanış edirik:

“Artıq rəqibimizin necə əzmkar komanda olduğunu bilirik. Bizi ağır oyun gözləyir. Bunu dərk edirik. Məqsədimiz növbəti mərhələyə keçməkdi”.

- "Neftçi"nin baş məşqçisi kimi doğma meydanda ilk matça çıxacaqsız. Hansı hissləri keçirirsiz?
- "Bakcell Arena"dakı ilk oyunuma görə həyəcanlıyam. Əlbəttə istəyərəm ki, növbəti mərhələyə adlayaraq başlayım. Ümid edirəm ki, fanatlar stadionu dolduracaq və komandanı sona kimi dəstəkləyəcək. Onlara söz verirəm ki, hər matçda 200 faizimizi verməyə hazırıq ki, "Neftçi" uğurlar qazansın.

- İlk oyunda rəqib həmkarınız aqressiv görünürdü. Sanki belə fikir var idi ki, Adrian Mutu kimi bir mütəxəssisə qalib gəlim. Siz necə düşünürsünüz?
- Məşqçilər arasında da rəqabət gedir. Hər biri istəyir ki, qələbə qazanmaq üçün düzgün strategiya seçsin. Onu özümə rəqib şəxs kimi qəbul etmirəm. Məni narahat edən yeganə şey komandamın çıxışıdı. Rəqib baş məşqçi əsəbidisə, bu, mənim problemim deyil.

- Məlum məsələdi ki, "Neftçi" azarkeşləri yaxşı atmosfer yaradacaq. Bu ab-hava komandaya mənfi təsir edə bilər?
- Bir futbolçu olaraq da bu cür atmosferi hiss etmişəm. Həm yaxşı təsir edə bilər, həm də pis. Oyuna yaxşı başlasaq, atmosfer yaxşı təsir edə bilər. Oyun istədiyimiz kimi getməsə, futbolçuların üzərində təzyiq yarada bilər. "Neftçi" böyük tarixə malik klubdur. Əsas məqsədimiz odu ki, azarkeşləri stadiona cəlb edək.

- İlk oyunla müqayisədə heyətdə dəyişikliklər olacaq?
- İştirak ərizəsində oyunçuların sayı dəyişməyəcək. Yeni transferləri qeydiyyatdan keçirə bilməmişik. Böyük məmnuniyyətlə start heyəti deyərdim. Amma rəqib baş məşqçi də bizi izləyir. Ona görə də demək istəmirəm.

- Rəhman Hacıyev əsas heyətdə oynamağa hazırdı?
- Rəhman Bosniya və Herseqovinada öz işini yaxşı yerinə yetirdi. Mənim üçün əsas və ya əvəzedici futbolçu anlayışı yoxdu. Rəhman qollar vurmağa davam etsə, start heyətində çıxış edə bilər.

- Transferləri necə dəyərləndirirsiz?
- Bütün transferlərdən razıyam. Onlar bizə qoşulubsa, demək ki, oyunlarını bəyənmişəm.

- Ölkəmiz haqda fikirləriniz necədi?
- Bakını çox bəyənirəm. Burada insanlar mənimlə yaxşı davranırlar. Azərbaycan yeməkləri çox dadlıdı.