Elvin hazırdı, Juninyo ilə bağlı Qurbanov qərar verəcək
Çempionlar Liqasının 2-ci təsnifat mərhələsinin “Rakuv”la cavab oyununa hazırlaşan “köhlən atlar”ın heyətində itkilər var.
Marko Yankoviç 4-5 həftəliyə sıradan çıxıb. Səfər görüşündə isə Elvin Cəfərquliyev zədələnərək meydanı yarımçıq tərk etdi. Yeni transfer Juninyo da hələ ki Ağdam təmsilçisində debüt etməyib. Onun mikrozədəsi var. Görəsən, bu futbolçuların durumu necədi? Elvar Quliyevi dinləyək:
“Elvin Cəfərquliyevin zədəsi o qədər də ciddi deyil. Şükürlər olsun ki, MRT-yə ehtiyac olmadı. Hər şey qaydasında görünür. Sadəcə, oyun zamanı əzələsində qıcolma baş vermişdi. Juninyo isə hazırlığa gec qoşulub. Qurban Qurbanovu yaxşı tanıyırsız. O, belə məsələrdə tələsmir. Futbolçu tam qaydaya düşəndən sonra əsas heyətdə şans qazanır. Cavab görüşündə iştirak edib-etməyəcəyi çalışdırıcımızdan asılıdı. Ehtiyac olarsa, 10-15 dəqiqə oynaya bilər. Zədəsinə gəlincə, əzələlərində yüklənmə olmuşdu. O qədər də ciddi problemi yox idi. Tam hazır olsa, meydana çıxacaq”.
İLKİN SULTANLI
