Əli Koç “Qalatasaray”ı yalan rəqəmlər açıqlamaqda suçladı!
“Qalatasaray”ın Uilfrid Zahanı son anda “Fənərbaxça”nın əlindən oğurlayaraq heyətinə qatması Türkiyə futbolunda əsas müzakirə mövzularından biri kimi qalmaqdadı.
"Football-plus.az" xəbər verir ki, yeri gəlmişkən, “Cim-Bom” üçillik müqavilənin detallarını açıqlayıb. Ötən sayımızda Türkiyə mətbuatına istinadla Zahanın illik məvacibinin 5,5 milyon avro olacağını, eləcə də ona 6 milyon avro imza parası ödəniləcəyini yazmışdıq. İngiltərə mətbuatı hətta Zahanın illik qazancının 9,2 milyon avro olacağını iddia etmişdi. Amma bu rəqəmlərin hamısı yanlış imiş. Klubun rəsmi açıqlamasında qeyd olunub ki, 30 yaşlı oyunçuya illik 4,35 milyon avro məvacib ödəniləcək. İmza parası isə 2,33 milyon avro təşkil edəcək. “Qalatasaray” tarixinə Abdul Kader Keyta, Emmanuel Ebue, Didye Droqba və Jan-Mişel Seridən sonra 5-ci Kot d”İvuar təmsilçisi kimi düşən Zaha “14” nömrəli forma ilə oynayacaq.
Bu arada “Fənərbaxça” başqanı Əli Koç Zahanın “Qalatasaray”a qismət olması ilə bağlı ilk dəfə açıqlama verib. O, əzəli rəqibləri tərəfindən açıqlanan rəqəmlərin həqiqəti əks etdirmədiyini vurğulayıb:
“Sözügedən oyunçu ilə biz də görüşdük. İllik rəqəmlər 7,5 miyon avrodan başladı və 8,5, hətta 9 milyon avroya qədər yüksəldi. Bu üzdən danışıqları dayandırıb masadan qalxdıq. Sonra həmin oyunçunu rəqibimiz transfer etdi. Amma açıqladıqları rəqəmlər 100 faiz yanlışdı! Bunu sizə adım kimi əminliklə söyləyə bilərəm. Çünki əlimizdə sənədlər var. Bizdən tələb olunan məbləğin cəmi 50 faizinə ala biliblərsə, bir şey deyə bilmərəm. Bu, böyük uğurdu. Amma belə olmadığına əminən. Başqa transferlərdə də bu yola əl atırlar. Amma bunu hara sığışdırdıqlarını, necə yoluna qoyduqlarını bilmirəm. Gündəmimizdə olan oyunçularla danışıqlar davam edir. Bu yay transfer məsələlərində yetərincə uğurluyuq. Bu ayın sonuna qədər istədiyimiz bütün transferləri tamamlayacağıq”.
Qeyd edək ki, Əli Koç “Qalatasaray”ı rəqəmləri düzgün açıqlamamaqda günahlandıran ilk şəxs deyil. Ötən mövsümün sonlarına yaxın “Adana Dəmirspor” başqanı Murat Sancakın “Qalatasaray” guya İkardiyə illik 750 min avro ödəyirmiş, bu nağılı gedib başqalarına danışsınlar” açıqlaması böyük müzakirələrə səbəb olmuşdu. “Qalatasaray” prezidenti Dursun Özbək isə onun cavabını “istəyirsə, gəlsin bazamıza və mən ona sənədləri göstərim” sözləri ilə vermişdi. Bir neçə gün öncə “Samsunspor” başqanı Yüksəl Yıldırım da buna bənzər iddia səsləndirmişdi. O, Sedrik Bakambu ilə “Qalatasaray”dan öncə maraqlandıqlarını və bu futbolçunun bahalı olduğunu bildirmiş, eləcə də “Cim-Bom”un ona illik 1,5 milyon avro ödənəcəyi ilə bağlı açıqlamasına inanmadığına işarə vurmuşdu. Amma dünən Yüksəl Yıldırım bu açıqlamasının yanlış anlaşıldığını qeyd etdi.
Digər xəbərlər
