PSJ Mbappeni “ofsayd”a saldı
PSJ-də, belə desək, Kilian Mbappe adlı problemli vəziyyət davam edir. O, artıq klubun başbilənlərinin “səbr kasasını daşırıb”.
"Football-plus.az" xəbər verir ki, ulduz futbolçu PSJ-dən kənarda qalıb. Mbappe komandanın Yaponiyaya təlim-məşq toplanışına gedən heyətində yer almayıb. Paytaxt klubunun yaydığı məlumatda Kilianın kiçik qardaşı, 16 yaşlı Ethanın komanda ilə səfərdə olduğu bildirilir.
Yerli mənbələrdə PSJ ilə müqaviləsini yeniləmək istəməyən Mbappenin gec-tez satışa çıxarılacağı iddia olunur. Xatırladaq ki, 24 yaşlı oyunçunun sözləşməsinin müddəti 2024-cü ilin yayında başa çatacaq. “Ekip”in jurnalisti Loik Tanzi parislilərin iyulun 31-nə qədər heç bir klubla danışıq aparmayacağını iddia edir. O, buna əsas kimi dünya çempionunun ayın sonunadək müqaviləsini yeniləmək hüququnun olduğunu göstərir. Kilian qarşıdakı günlərdə bu addımı atmasa, avqustin 1-dən rəsmən transferə çıxarılacaq. “Athletic” nəşrinin jurnalisti Mario Korteqanın bildirdiyinə görə, PSJ rəhbərliyi futbolçunun satışından 100 milyon avrodan çox qazanmaq istəyir, amma ona görə 200 milyon avroya yaxın təzminat tələb etməyəcək.
Yox, Mbappe Parisi bu yay tərk etməsə, mövsümboyu ehtiyatda qalmağa məcbur edilə bilər. Maraqlıdı ki, o, belə aqibətlə barışmağa hazırdı. Bunu jurnalist Danel Riolo deyir:
“Kiliana çox yaxın olan bir neçə şəxslə söhbət etmişəm. O, hətta oynamasa belə, yeni mövsümü PSJ-də keçirməyə hazırdı. Əlbəttə, Mbappe indiki vəziyyətinə görə çox qəzəblidi. Onu da deyim ki, onun yaxın ətrafı tezliklə hər hansı açıqlama verməyi düşünmür. Onlar öz versiyalarını bəyan etmək üçün sentyabra qədər gözləməyi lazım bilirlər”.
Belə görünür, futbolçu üçün mövsümə 60 milyon avro maaş və 2022-ci ilin mayında müqaviləni yenilədiyi üçün loyallıq bonusu kimi daha 90 milyon avro almaq vacibdi. Kilian bu 150 milyon avro ilə mövsümün sonunda Parisi azad agent kimi tərk etməyi və formasını geymək istədiyi “Real”la 2024-cü ilin yanvarında müqavilə bağlamağı planlaşdırır. Bu da son deyil: futbolçu İspaniya klubundan hələ bir il əvvəl razılaşdırıldığı deyilən və təxminən 100-125 milyon avro olduğu imza pulunu da cibinə qoymaq arzusundadı. Onu bir ildən sonra heç nə qazanmadan buraxmaq istəməyən PSJ rəhbərliyinin son addımı başadüşüləndi. İndi ona iyulun 31-nə qədər vaxt verilib. Deyilənə görə, ölkənin prezidenti Emmanuel Makron artıq yenidən danışıqlar prosesinə müdaxilə edib.
Son xəbərlərdə “Əl-Hilal”ın Mbappeyə görə PSJ-yə 300 milyon avro təklif etdiyi və səbəbkara ilə 700 milyon avro maaş ödəməyə hazır olduğu bildirilir. O da maraqlıdı ki, Səudiyyə Ərəbistanı klubu özü istəyəcəyi halda gələn yay Kilianı havayı “Real”a buraxmağa da razıdı.
Digər xəbərlər
