Kilian Mbappe ilə bağlı daha iki xəbər yayılıb. Son məlumatlarda onun yeni mövsümə PSJ-də başlayacağı bildirilib.

"Football-plus.az" xəbər verir ki, 24 yaşlı hücumçu Paris klubu ilə müqaviləsini daha bir il müddətinə avtomatik yeniləmək seçimini aktivləşdirməmək qərarına gəlib. Bu xəbəri “Ekip” qəzeti yayıb.

Buna baxmayaraq, PSJ rəhbərliyi hazırkı müqaviləsinin müddəti 2024-cü ilin iyununda başa çatacaq Mbappenin qərarından təşvişə düşmür və sözləşmənin sonuna bir il qalmış hücumçusunu satmaq fikrində də deyil.

Kilian ilə bağlı digər xəbərə görə, o, bu yay klubdan ayrılmasa, böyük məbləğdə bonus alacaq. “RMC Sport”un məlumatında dünya çempionunun Parisdə qalacağı halda 90 milyon avro bonus alacağı bildirilib. Kilianın PSJ-dən narazı olduğu qeyd edilir. Ötən yay klubun transfer bazarındakı fəaliyyəti onu qane etməyib. Bu fikir yalnız komandaya gələn oyunçularla bağlı deyil, klubu tərk edənlərə də aiddi. Üstəlik Mbappeni PSJ-nin mövsüm başlamazdan əvvəl ona lazım olan bonusu ödəməməsi də əsəbiləşdirib.

Qeyd edək ki, ulduz futbolçu bu mövsüm PSJ-nin heyətində bütün turnirlərdə 41 oyuna çıxıb, 40 qol vurub və 9 məhsuldar ötürmə verib.