PSJ rəhbərliyinin nəhayət, səbri daşdı. Kilian Mbappe ilə bağlı məsələdə dünən yeni və mühüm bir hadisə baş verdi.

"Football-plus.az" xəbər verir ki, dünən Paris nəhəngi öz bazasında ''Havr'' ilə hazırlıq oyunu keçirdi və 2:0 hesabı ilə qalib gəldi. Mbappe 66-cı dəqiqədə meydana çıxdı və son saniyələrdə yekun nəticəni müəyyənləşdirdi.

Oyundan sonra PSJ Yaponiya turnesinə yollanacaq futbolçuların siyahısını açıqladı. Orda Mbappeyə yer verilmədi! Sonra isə məlum oldu ki, PSJ Mbappeni satışa çıxarıb və istənilən təklifi dinləməyə hazırdı.

Xatırladaq ki, Paris nəhənginin sahibi Nasser Əl-Xelayfi iyulun 5-də Mbappeyə düşünmək üçün 2 həftə vaxt verdiklərini açıqlamışdı. Əslində rəhbərlik son ana qədər də Kilianın fikrindən daşınacağına və yeni müqaviləyə imza atacağına inanırdı. Ən son rəhbərlik 24 yaşlı futbolçuya 2032/33 mövsümünə qədər nəzərdə tutulan müqavilə təklif etdi.

Razılıq versəydi, Mbappe həmin tarixə qədər 1 milyard avro (!) qazana bilərdi. Amma Mbappe yenə təklifi geri çevirdi. Rəhbərliyin fikrincə, o artıq ''Real'' ilə razılığa gəlib və gələn yay Paris pulsuz tərk etməkdə qərarlıdı. Parislilər bunu satqınlıq kimi qiymətləndirərək Mbappeni satışa çıxarıblar.

ƏLİ