Beynəlxalq futbolda yeni kubok təsis edilib.

"Football-plus.az" xəbər verir ki, “Sevilya” (İspaniya) və “İndependyente del Valye” (Ekvador) tezliklə Sevilya şəhərində qarşılaşacaq.

Avropa (UEFA) və Cənubi Amerikanın (KONMEBOL) ali futbol qurumları arasında davam edən əməkdaşlıq çərçivəsində Çağırış Kuboku təsis edilib. Bu kubok uğrunda ilk dəfə Avropa Liqasının 2022/23 mövsümünün qalibi “Sevilya” və Sudamerikana Kubokunun 2022-ci ildəki çempionu “İndependyente del Valye” mübarizə aparacaq. Komandalar İspaniyanın Sevilya şəhərindəki “Ramon Sançes Pisxuan” stadionunda iyulun 19-da qarşlaşacaqlar.

Yeni kubokun keçirilmə forması da açıqlanıb. Çağırış Kubokunda oyun vaxtı 90 dəqiqə müəyyən edilib. Bu müddətdə qalib müəyyənləşməyəcəyi halda dərhal penalty seriyası qaydası tətbiq olunacaq. Başqa sözlə, 30 dəqiqəlik əlavə vaxt nəzərdə tutulmayıb. Qalib komanda kubok və medallarla təltif olunacaq. İlk matçın hakimlərini UEFA təyin edəcək. Hər iki klubun və neytral azarkeşlər üçün nəzərdə tutulan biletlər “Sevilya” vasitəsilə reallaşdırılacaq.

İlk Çağırış Kuboku “Antonio Puerta XII” adlanacaq. Təşkilatçılar bu qərarla “Sevilya”nın 2007-ci ildə ürəktutması nəticəsində 22 yaşında vəfat edən sabiq oyunçusunun xatirəsini əbədiləşdirmək istəyiblər.