"Tək “Misli” ilə yox, başqa bir şirkətin də sponsorumuz olmasıyla bağlı danışıqlar aparırıq. Qarşıdakı günlərdə məsələyə tam aydınlıq gələcək. Sadəcə, indidən ad çəkmək düz deyil. "İnsport.tv"yə gəlincə, onlarla yeni mövsümdən əməkdaşlıq etməyəcəyik. Adı çəkilən şirkətin ötən mövsümdəki qüsurları, maliyyə, xidmətlər və digər məsələlərindən narazıyıq. Oyunların yayını zamanı da onlarda ciddi problemlər olduğundan tez-tez bizə şirkətlə bağlı narazılıq və şikayətlər daxil olurdu. Odu ki, əməkdaşlığa son verdik. Əvəzində başqa xarici yayın şirkətiylə danışıq aparırıq. "CBC Sport"un yayınında da problemlər, nöqsanlar var. Amma bunu yalnız telekanala bağlamaq ədalətsizlik olar. Çünki stadionlarımızda da problemlər çoxdu. Elə futbol məkanları var ki, orda keyfiyyətli çəkiliş aparmaq olduqca çətindi. Hələ günəşli havada lap çətin olur. "CBC Sport"un axşam saatlarında yayınladığı matçlara baxsaz, görərsiz ki, peşəkarlıq, keyfiyyət var. İkinci məsələ isə maddiyyatla bağlıdı. Bu gün fərqli rakurslardan keyfiyyətli çəkiliş etmək üçün lazım olan avadanlıqlar çox bahadı. Telekanalın da onları almağa imkanı yoxdu. Bizim çempionat top-liqalardan yalnız səviyyəsinə görə yox, həm də çəkiliş, yayın və bundan əldə olunan böyük qazanca görə geri qalır. Buna rəğmən, "CBC Sport" ilbəil peşəkarlaşır və keyfiyyətli yayın təşkil edir. Odu ki, “inkişaf yoxdu” demək ədalətsizlik olar. Oyunların yayınının "CBC Sport"la yanaşı, "İdman TV" və ya digər kanallara verilməsi gündəmdə deyil. Əslində bunu etmək də sadə məsələ deyil. Çünki "CBC Sport" yalnız premyer-liqanın yox, həm də VAR yayının ölkəmizdəki yeganə hüquçusudu. Yəni adı çəkilən telekanal artıq püxtələşib. Çempionatın yayın hüququ başqa telekanala verilsə, gərək onların çəkiliş edən əməkdaşlarına VAR ilə bağlı kurslar, seminarlar keçək".