“Lex” səddini inamla keçən “Qarabağ”ın sabah növbəti transferi elan etməsi gözlənilir. 2014-20 aralığında Braziliyanın “Qolas”, “Atletiko Paranense”, “Ponte Preta” klublarında çıxış edən, 2020-nin yayında isə “Santa-Klara”ya üz tutan Julio Romao artıq Bakıdadı. Portuqaliya klubunda əsas heyət üzvü sayılmayan 24 yaşlı braziliyalı ağdamlılara heç də baha başa gəlməyib. Dayaq yarımmüdafiəçisi mövqeyində çıxış edən, daha çox Patrik Anradenin və lazım gələndə Qara Qarayevin yerini doldurmaq üçün alınan Julio Azərbaycan çempionu ilə “3+1” illik müqavilə bağlayacaq.
Burda maraq doğuran daha bir sual var: “Qarabağ” sabah gün ərzində transferi rəsmiləşdirə, həm də yeni futbolçunun adını “Sürix”lə duel üçün iştirak ərizəsinə sala biləcəkmi? Əslində klubun ixtiyarında bunun üçün yetərincə zaman var. “Sürix”lə oyun çərşənbə axşamı keçiriləcək, “Qarabağ” isə sabah Mərkəzi Avropa vaxtı ilə 00.00-a (Bakı vaxtı ilə 19 iyul 03.00-a) qədər futbolçunu qeydiyyatdan keçirə bilər.