“Formula-1” dünyası ilə bağlı bəzi maraqlı xəbərlər var.

"Football-plus.az" xəbər verir ki, “Ferrari”nin sabiq prezidenti Luka di Montedzemelo “Aston Martin”in səhmdarına çevrilib. O, bu komandaya 4 milyon dollar yatırıb. Di Montedzemelo şirkətin sonrakı inkişafına və perspektivlərinə inanır. Hazırda səhmlərə ümumi nəzarət paketinin qiymətini nəzərə alsaq, “Aston Martin” 1 milyard dollara dəyərləndirilir.

Di Montedzemelo komandanın sahibi Lorens Stroll ilə çoxdanın tanışıdı. Vaxtilə Strollun xeyli vəsait yatırdığı “Tommy Hilfiger” şirkəti “Ferrari”nin sponsoru olub. “Aston Martin” “Formula-1” çempionatının cari mövsümündə 181 xal toplamaqla Mühəndislər kubokunda 3-cü yerdə qərarlaşıb.
Bu arada Beynəlxalq Avtomobil Federasiyasının (FIA) iki komandanın 2026 mövsümündən “Formula-1” çempionatında iştirakla bağlı sifariş ərizəsinin təsdiqləməyə yaxın olduğuna dair xəbər yayılıb. “Auto Motor und Sport”un əməkdaşı Mihael Şmidtin iddiasına görə, Beynəlxalq Avtomobil Federasiyasında əyləşənlər “Andretti” ilə “Haytek”in sifariş ərizəsindən razıdılar. Qurumun qərarı yaxın vaxtlarda açıqlanmalıdı. Hər iki komanda çempionatın “Liberty Media”dan olan sahiblərinin təsdiq cavabını da almalıdı. Xəbərdə o da deyilir ki, hər iki komanda texnologiyalar, personal və maliyyə baxımından çempionatda iştirak etməyə qadirdi. O da maraqlıdı ki, hazırda “Formula-1”də çıxış edən komandaların əksəri yenilərin mübarizəyə qoşulmasının əleyhinədi.

“Uimbldon”un mərkəzi kortunun təhlükəsizlik xidmətinin rəhbəri Alan Çalmersin danışdığı bir əhvalatdan da xəbərdar olmağa dəyər. Onun dediyinə görə, 2015-ci ildə “Mersedes”in pilotu Lüis Hemiltonu turnirin Kral lojasına buraxmayıb: “Lüis Hemiltona ora girə bilməyəcəyini demək mənim səlahiyyətimə daxil deyildi. Ancaq deməliyəm ki, bu, doğru qərar idi. Onun üzərində nə pencək var idi, nə də qalstuk. “Uimbldon” Marbelya çimərliyi deyil, nəhəng tennis turniridi”.

Ümumingiltərə klubunun icraçı direktoru Salli Bolton sonradan xəbər verib ki, münaqişəni yoluna qoymaq mümkün olub: “Vəziyyəti qaydasına sala bildik. Lüisə anlatdıq ki, sonrakı illərdə gələrsə, onu Kral lojasında görməkdən çox məmnun olarıq”.

Turnirin qaydalarına görə, Kral lojasında yer alanlar rəsmi üslubda geyinməlidi, pencək və qalstukda olmalıdı. Hemilton isə ora güllü köynəkdə və başında şlyapa gəlibmiş.

Xatırladaq ki, “Uimbldon”un 2015-dəki finalında serb Novak Cokoviçlə isveçrəli Rocer Federer üz-üzə gəlmişdi. Federeri 7:6, 6:7, 6:4, 6:3 hesabıyla məğlub edən Cokoviç turnirin qalibi olmuşdu.