Alonso “Aston Martin”i seçməsinin səbəbini açıqlayıb
Fernando Alonso “Aston Martin”lə uzunmüddətli müqavilə imzalamasını belə şərh edib: “Sözsüz, “Aston Martin”in qələbə yönəlik enerjisi və canatımı var. “Aston Martin” hazırda “Formula-1”də yarışan ən maraqlı komandalardan biridi. Lorens və Lens Strolları illərdi tanıyıram, aydın məsələdi ki, “Formula-1”də özünü göstərmək ambisiyasına və ehtirasına sahibdilər. Komandanın qələbə təcrübəsinə malik əla mütəxəssisləri sistematik şəkildə dəvət etdiyini görürəm, bazanı və Silverstoundakı başqa resursları inkişaf etdirmək planlarından xəbərdaram. Komanda “Formula-1” üzrə dünya çempionatında qələbəyə can atır, bu isə mənim üçün cəlbedici şansdı. Hələ də liderlər arasında mübarizə aparmaq həvəsi ilə alışıb-yanıram, öyrənməyə, uğura və inkişafa yönələn komandanın bir parçası olmaq istəyirəm. Yenidən qələbələr qazanmaq istəyirəm, bu üzdən doğru saydığım şanslardan yararlanmalıyam”.
Xatırladaq ki, Alonso “Aston Martin”də 2022 mövsümünün ardından karyerasını bitirəcək Sebastyan Fettelin yerini tutacaq. 41 yaşlı ispaniyalı pilot hazırda “Alpin”in şərəfini qoruyur. Dördqat dünya çempionu 41 xalla şəxsi hesabda 10-cu yerdə qərarlaşıb.
