“Mançester Yunayted” əsas qapıçı ilə bağlı problemi həll edib. Komandadan azad agent kimi ayrılan David De Xeanın yerini tutacaq oyunçu ilə bağlı məsələ yoluna qoyulub.

"Football-plus.az" xəbər verir ki, İngiltərə klubu “İnter”in qapıçısı Andre Onananın transferini yaxın günlərdə açıqlayacaq.

“The Guardian” qəzetinin xəbərinə görə, tərəflər 27 yaşlı oyunçunun transferi ilə bağlı cümə günü bir daha danışıq aparıb və keçid razılaşdırılıb. Transferin MY-yə 50 milyon avroya başa gələcəyi gözlənilir.

Onana “İnter”ə ötən yay “Ayaks”dan azad agent kimi keçib. Son mövsümdə milanlılarla İtaliya kuboku və superkubokunu qazanıb. Komandanın Çempionlar Liqasının finalına qədər irəliləməsində böyük rolu olub.

Yeri gəlmişkən, De Xeadan sonra “Yunayted”i daha bir qapıçı tərk edəcək. Artıq Din Hendersonun komanda ilə ABŞ turnesinə yollanmayacağı məlum olub. Zədədən əziyyət çəkən futbolçu yeni mövsümə də “Nottingem Forest”də başlaya bilər. Bu klub onun xidmətində maraqlıdı. Xatırladaq ki, Din premyer-liqanın son mövsümündə nottingemlilərin qapısını 18 oyunda qoruyub.