Hazırda İngiltərədə ən çox müzakirə olunan mövzulardan biri David De Xeanın gələcəyidi. Deyəsən, 2011-ci ildən “Mançester Yunayted”in şərəfini qoruyan məşhur qapıçı artıq bu kluba lazım deyil.

"Football-plus.az" xəbər verir ki, iyunun 30-da mankunianlarla müqavilə müddəti başa çatdığından 32 yaşlı əlcək sahibi hazırda azad agent statusundadı!

Qeyd edək ki, iyulun 1-də De Xeanın toyu olub. O, həyatını uzun müddətdi birlikdə olduğu Edurne Qarsiya Almaqro ilə birləşdirib. De Xeadan 5 yaş böyük olan bu xanım 2015-ci ildə İspaniyanı “Avroviziya” mahnı müsabiqəsində təmsil edib. Hazırda isə o, aparıcı kimi çalışır. De Xeanın 2022/23-dəki performansına dəqiq qiymət vermək çətindi. Düzdü, o yenə də ənənəsinə sadiq qalaraq bəzi matçlarda kobud səhvlərə yol verdi. “Mançester Siti”, “Brentford”, “Vest Hem” və xüsusilə də “Sevilya” ilə oyunları “Yunayted” fanatları gözəl xatırlayır. Amma digər tərəfdən tanınmış qapıçı ötən mövsüm “Qızıl əlcək” mükafatının sahibi oldu. Belə ki, o, premyer-liqada hamıdan çox – 18 qarşılaşmada qapısından top buraxmadı! De Xeanın “Yunayted”də həftəlik qazancı 375 min funt sterlinqdi. Əslində yeni müqavilə ilə bağlı danışıqlar hələ apreldə başlamışdı. De Xea da “Yunayted”dən ayrılmaq istəmirdi. Ona görə də belə güman olunurdu ki, tərəflər mövsümün sonuna qədər razılıq əldə edəcək. “Yunayted” rəhbərliyi De Xeanın qazancını təxminən yarıbayarı azaldıb əvəzində bonusları artırmağı təklif etmişdi. İspaniyalı qapıçı bu təklifi geri çevirsə də, mayda tərəflər anlaşmağa yaxın idi. Amma “Yunayted” De Xeaya yeni mövsümdə onun əsas qapıçı olacağı ilə bağlı zəmanət vermirdi. Sonradan planlar dəyişdi. “Qırmızı şeytanlar” birdən-birə qapıçı axtarışına çıxdılar. Müqavilə müddətinin bitməsinə az qalmış isə məlum oldu ki, “Yunayted” De Xeaya irəli sürdüyü təklifi geri çevirib! Maraqlıdı ki, bu cür qapıçıya Avropadan təklif yoxdu. Ona maraq göstərən yeganə klub Kriştiano Ronaldonun şərəfini qoruduğu “Əl-Nəssr”di. Şayiələrə inansaq, ərəblər ispaniyalıya həftəlik 250 min funt sterliq maaş təklif edib. Ona görə də bundan sonra nə olacağını heç kim bilmir.

De Xeanın yerini tutmağa əsas namizəd isə ötən mövsüm “İnter”in ÇL-in finalına yüksəlməsində heç də az rol oynamayan Andre Onanadı. Bu da təəccüblü deyil. 27 yaşlı kamerunlu qapıçı “Yunayted”in baş məşqçisi Erik ten Haqa gözəl tanışdı. Çünki yaxın keçmişdə uzun illər “Ayaks”da onun başçılığı altında oynayıb. Jurnalist Alfredo Pedullanın məlumatına görə, “Yunayted” “İnter”ə ilk təklifini irəli sürərək 5 milyon avrosu bonuslarla olmaqla masanın üzərinə 45 milyon avro qoyub. Bu təklif Milan klubunun rəhbərliyini qane etməyib. “İnter” qarşı tərəfdən 50 milyon avro və 10 milyon avro bonus tələb edir. Tərəflərin təxminən 50 milyon avroya anlaşacağı gözlənilir. Onananın ÇL-in finalındakı performansını hətta “Mançester Siti”nin baş məşqçisi Xosep Qvardiola da tərifləmişdi. Onun ayaqla oynamağı bacarmaq özəlliyi və daha hərtərəfli qapıçı olması xüsusi qeyd olunmalıdı. Ten Haqın fikrincə, belə qapıçının transferi “Yunayted”i yeni səviyyəyə qaldıracaq.

RAMİL YUSİFOV