Futbol dünyasında daha çox ''Mançester Yunayted''dəki çıxışı ilə yaddaşlarda iz buraxan portuqaliyalı ulduz Luiş Naninin yolu Türkiyədən də keçib.

“Football-plus.az” xəbər verir ki, o, 2015/16-da ''Fənərbaxça''nın şərəfini qoruyub. Ümumiyyətlə həmin mövsüm İstanbul nəhəngində Nanidən başqa Kyaer, Bruno Alveş, Dieqo, Meyreleş, Van Persi kimi ulduzlar var idi. Amma komanda ''Beşiktaş''ı özündən irəli buraxaraq yalnız 2-ci pillə ilə kifayətlənmişdi. 6 milyon avroya alınan Nani həmin mövsüm 47 rəsmi oyuna 12 qol vurmuş və növbəti il 8,5 milyon avroya ''Valensiya''ya transfer olunmuşdu. Daha sonra ''Latsio'', ''Sportinq'', ''Orlando Siti'' və ''Venetsiya''da forma geyən 36 yaşlı vinger hazırda Avstraliya təmsilçisi ''Melburn Viktori''nin şərəfini qoruyur. Dünən Türkiyəyə gələn və ''Ankaragücü'' ilə oyunu tribunadan izləyən Nani qarşılaşmadan öncə ''Fənərbaxça TV''nin qonağı olaraq bunları deyib:

''Hava limanında fanatların məni o cür qarşılaşmasını heç vaxt unutmayacam. Mənim üçün çox özəl anlar idi. Bir futbolçu bu cür qarşılandığı zaman təbii ki, bunun qarşılığını vermək üçün əlindən gələni edir. Mən də bunu etməyə çalışdım. Daim ''Fənər''in uğur qazanmasını istəyirəm. Ümid edirəm ki, komanda bu il çempionluq həsrətinə son qoyacaq. Bu mövsüm hər şey mümkün ola bilər. ''Fənər''in heyətində əla oyunçular var. Başlarında da mükəmməl bir məşqçi dayanıb. ''Qalatasaray''ın durumu daha yaxşı olsa da, onları təzyiqdə saxlamaq üçün ''Fənər'' qalan oyunlarda qalib gəlməlidi. Komanda xal itirmədən sabit şəkildə yoluna davam etsə, çempion ola bilər''.