Baş məşqçi Rusiyadan gələnlərdən razıdı, Türkiyədən gələnlərdən yox
Qadın futbolçularımız Millətlər Liqasına hazırlaşır
Qadın futbolçulardan ibarət milli komandamız Latviyadakı təlim-məşq toplanışı çərçivəsində beynəlxalq yoldaşlıq oyunu keçirib. Latviya yığması ilə oyun 1:1 hesabı ilə nəticələnib. Millinin heyətində Alina Dorofoyeva fərqlənib. Komandalar arasında növbəti oyun sabah keçiriləcək. Görəsən, yığmada durum necədi? Oyun necə keçib? Toplanışda iştirak nəyə hesablanıb?
Bu suallarla yığmanın baş məşqçisi Siyasət Əsgərova müraciət etdik. O, "Football-plus.az"a bunları dedi:
"İyulun 9-da Bakıda təlim-məşq toplanışına hazırlaşmaq üçün komanda ilə bir araya gəldik. İlk gün 1, digərlərində isə 2 məşq edə bildik. Ayın 13-ü Latviyaya yola düşdük. 14-ü isə birinci oyuna çıxdıq. Qalib gəlmək istəyirdik. Hesabı biz açmışdıq. Təəssüf ki, qarşıdakı dəqiqələrdə səhvə yol verdik. Rəqib bundan istifadə edib qol vurdu. Oyun ərzində yerli komandaya çətin anlar yaşatsaq da, bəzi çatışmazlıqlar üzündən top qapıdan keçmədi. Bunun əsas səbəbi komandanın matça tam hazır olmaması idi. Rusiyada çempionat davam etdiyindən həmin legionerlər formada idi. Türkiyədən gələnlər isə oyuna uyğun deyildi. Çünki qardaş ölkədə çempionat başa çatıb".
Mütəxəssis təlim-məşq toplanışının məqsədindən və planlardan da söz açdı:
"Bu matçlar xüsusi əhəmiyyət daşıyır. İlk oyunu yenidən izləyib, təhlil edəcəm. Səhvləri aradan qaldırmağa çalışacam. Növbəti qarşılaşmada qalib gəlmək istəyirik. Təlim-məşq toplanışı sentyabrda keçiriləcək Millətlər Liqası oyunları üçün vacibdi".
Qeyd edək ki, qadınlardan ibarət yığma sentyabrın 22-də Cənubi Kiprlə Bakıda, 26-da isə Monteneqro ilə səfərdə qarşılaşacaq.
KƏNAN BAHADIR
Digər xəbərlər
