"Neftçi" hazır deyil. Həm taktiki gedişlərdə, həm xətlərarası əlaqədə, həm oyun, həm də psixoloji planda böhran var. Ümumiyyətlə, "ağ-qaralar"ın bu turnirdə çıxış etməsini anlamıram. Rusiyadakı turnirin əvəzinə yaxşı təlim-məşq toplanışı keçirilsəydi, transfer bazarında fəallıq göstərilsəydi və yeni məşqçinin adına aydınlıq gətirilsəydi, daha yaxşı olardı. Hələ iki təcrübəli qapıçısını itirmək də ayrıca problem yaradacaq. Baş məşqçinin adının biliməməsi çox ciddi problemdi. İstənilən komandada baş məşqçi təyinatı nə qədər gecikirsə, heyəti formalaşdırmaq, öz şərtlərini, tələblərini, oyun fəlsəfəsini futbolçulara aşılamaq bir o qədər də vaxt aparır. Artıq "Neftçi"də bir xoşagəlməz ənənə formalaşıb. Komanda mövsüm bitəndə baş məşqçiylə yollarını ayırır, yeni mütəxəssislə də avrokubokun oyununa sayılı günlər qalanda razılığa gəlir. Digər məsələ illərdi transfer siyasətindəki uğursuzluqlardı. Komandaya son illərdə keyfiyyət göstəricisi aşağı olan oyunçular cəlb olunur. Bizim yerli futbolçulardan heç nədə üstün deyillər. "Neftçi" Konfrans Liqasında özünü yaxşı tərəfdən göstərib, mərhələlər keçmək, yeni mövsümdə çempionluğa oynamaq istəyirsə, mütləq güclənməli və səviyyəli futbolçular transfer etməlidi. Bilmirəm, klub rəhbərliyi bu məsələrlə bağlı düşünür, ya yox? Oxuyuram ki, komandaya Adrian Mutu gətirilir. Amma ortada hələ fakt yoxdu. Hər keçən gün "Neftçi"ni uğursuzluq bataqlığına çəkir. İstər Mutunun gətirilməsinin, istərsə də İqor Getmanın saxlanılmasının komandanı uğura aparacağını düşünmürəm. Çünki klubda yuxarıda qeyd etdiyim məsələlərlə bağlı ciddi çatışmazlıqlar var. Adını çəkdiyim mütəxəssislər sabah avrokubokda və ölkə çempionatında uğursuzluğa məruz qalanda, deyəcəklər ki, biz yeni gəlmişik, komandanı yenidən qururuq, fəlsəfəmizi futbolçulara tam aşılaya bilməmişik. Qısası, "Neftçi"də hazırda işlər qaydasında deyil. Ümid edək ki, yaxın bir neçə gündə yeni baş məşqçinin adına aydınlıq gələcək və "ağ-qaralar" həm avrokubokda, həm də ölkə çempionatında yaxşı çıxış edəcək. "Neftçi" Azərbaycan futbolunda tarix yazan, ilklərə imza atan klubdu. Fanatları başda olmaqla bütün xalqımız komandadan həmişə yaxşı nəticələr gözləyib və gözləyəcək".