Çox-çox əvvəl Bakı Dövlət Sirkində maraqlı bir meyxana məclisi baş tutub. İnternetdə axtarış verib tapa bilərsiz. Baş rollarda mərhum Vuqar Biləcəri ilə prokurorun bir neçə gün əvvəl 11 iş tələb etdiyi Rəşad Dağlı çıxış edir.

Qafiyə də belədi: “Sənin, deyəsən, yuxun gəlir, yatmağa get, yatmağa, gəlməmisən sirkə at oynatmağa, get yatmağa”.

Vüqar sözarası “Ögey ana” filmini yada salaraq, “atan gedib dağları partlatmağa, get yatmağa” ifadəsini də işlədir. Kəsəsi, maraqlı deyişmədi, vaxt tapsaz, baxın. Mən niyə həmin deyişməni xatırladım, indi biləcəksiz...

Son günlər “Eqnatya”nın azərbaycanlı futbolçusu Vüsal İsgəndərli ətrafında qeyri-adi ajiotaj yaranıb. Nədi-nədi, adam yenicə transfer olunduğu komandanın heyətində İrəvanda, murdar Vazgen Sarkisyanın adını daşıyan stadionda meydana çıxacaq, ermənilərə zərbə vurmağa çalışacaq. İçi biz qarışıq, Azərbaycanda bu olaya toxunmayan qəzet, sayt yoxdu. Belə məsələlərin, adətən, iki başı olur: ya adam meydana çıxaraq xarüqələr yaradacaq, ya da, sadəcə, “yanacaq”.

Əslində sanki Vüsal özü də adı ətrafında məhz belə, inanılmaz ajiotaj yaranmasında maraqlıdı. Albaniya klubunun ona viza almasının texniki yönlərindən tutmuş az qala hansı rəngdə buts geyəcəyinə qədər anlatmağa çalışır. Ümumiyyətlə, bu futbolçunun ölkəmizdə də özünəməxsus imici var idi. Qəsdən, ya da bilmədən tumanını az qala budun dibinə qədər çəkirdi ki, əzalarını millətə-azarkeşə göstərsin. Güman edirəm ki, İrəvanda bu əcaib hərəkəti təkrarlamayacaq. Ən azı ona görə ki, yerli publika bunu anlamayacaq, stadionda təxribat baş verəcək və bundan ən böyük ziyan görən də elə futbolçu özü olacaq. Azarkeş istər erməni olsun, istərsə də azərbaycanlı, ona münasibətdə müəyyən əxlaqi-etik davranış qaydaları gözlənilməlidi.

Şəxsən mən İsgəndərlinin o cür davranışını heç vaxt bəyənməmişəm, əksinə, düşünmüşəm ki, baş məşqçisi ona ictimaiyyət önündə davranış qaydalarını anlatmalıdı. Tuman uzunluq edirsə, nisbətən qısa ətəklisini geymək olar. Amma geyimi nümayişkaranə şəkildə budun dibinə çəkib, sonra da azarkeşdən hörmət gözləmək – bax, bu yolverilməzdi. Vüsal haqlı tənqiddən nəticə çıxarmalı, İrəvanda qeyri-adi jestlər yox, qeyri-adi qollar ilə yadda qalmalıdı. Təbii, o qədim türk şəhəri türklərin qolları üçün darıxıb. Anadolu türkləri vaxtaşırı qonşularımızın ağzının payını verir, indi isə növbə Vüsalındı!

ORXAN