“CBC Sport”un türkiyəli baş direktoru Volkan Üst Azərbaycana gələndə xeyli iddialı açıqlamalarla çıxış etmişdi. Onun şirin vədləri idman telekanalının izləyicilərini, futbol azarkeşlərini həyəcanlandırırdı.

İndi həmin vədlər çoxdan unudulub. Bəlkə də Volkan bəyin özü də ağzından çıxan sözlərin çoxunu yaddan çıxarıb. Maşallah olsun ki, mənim yaddaşım hələ korlanmayıb. İndi də onun sözlərinin bəzilərini xatırlayıram.

Həmin vədlərdən biri də o idi ki, Volkan bəy “CBC Sport”a öz ideyaları ilə gəlir və xeyli maraqlı layihələrlə çıxış edəcək. Belə şirin vədlərdən, gurultulu açıqlamalardan da biri o idi ki, cənab Üstün rəhbərliyi ilə “CBC Sport”un təklif etdiyi layihələr maraqlı olduğuna görə məşhur Acun Ilıcalını da cəlb edəcək.

İş o yerə gəlib çatacaq ki, Acun bəy özü “CBC Sport”la birlikdə çalışmağa həvəs göstərəcək, Azərbaycana gəlib, bizim telekanalın qapısında yatacaq.

Volkan bəy çoxdan dəbdən düşüb. Onun gurultu ilə vəd etdiyi layihələrin heç birini görmədik. Zaman keçdikcə rəhbərlik etdiyi “CBC Sport” da standart bir Azərbaycan kanalına çevrildi. İndi gözüyumulü demək mümkündü ki, Azərbaycan çempionatının hansı oyununu kim şərh edəcək, matçdan sonra efirə çıxarılacaq ekspertlər kimi tərifləyib, kimi tənqid edəcək. Kanalda efirə çıxan tək-tük müəllif verlişləri, bir çox layihələr də artıq tarixin yaddaşına qovuşub.

Deyilənə görə, Üstün də Azərbaycandan və sözsüz ki, “CBC Sport”dan göndərilməsi zaman məsələsidi. Onun himayədarı Elxan Məmmədov çoxdan başını götürüb Parisə gedib.

Düzdü, sabiq baş katib ordan da futbolumuza nəzarət edir, bəzi məsələlər yenə də onun iradəsiylə həll olunur. Amma Üst və onun gələcəyi Məmmədov üçün maraqlı deyil. O, məhdud imkanlarından “türkiyəli televizyonçu” üçün istifadə etmək fikrində deyil. Çünki o da “CBC Sport”da Volkan bəyə ehtiyac olmadığını yaxşı başa düşür. Telekanalda kimin baş direktor olmasının bundan sonra elə də ciddi əhəmiyyəti yoxdu.
Üstə cansağlığı, gələcək fəaliyyətində (Türkiyədə özünə bir iş tapa bilsə) uğurlar arzulayaq.

Biz daha vacib adamlardan danışaq. Bizim üçün indiki məqamda Üst yox, onun həmyerlisi Acun Ilıcalı vacibdi. Sözün düzü, Acun bəyi Üstdən bir köynək özümüzə yaxın sayıram. Çünki Türkiyənin tanınmış simalarından olan Ilıcalı şəxsən özü qatıdlığı televiziya proqramlarından birində demişdi ki, əsli-kökü Azərbaycana gəlib çıxır, ona görə də xarici görkəmcə yaraşıqlıdı. İnternetdə axtarış etməklə onun bu sözlərinı tapıb oxumaqla əmin ola bilərsiz.

Futbolumuz Üstdən bir xeyir görməsə də, Ilıcalıdan görə bilərik. Bir halda ki, adam özünü azərbaycanlı sayır, nə üçün biz də ona qucaq açıb, ondan faydalanmayaq? Mən Acun bəyin AFFA ilə işbirliyinə girib, “CBC Sport”a baş direktor gətirilməsini nəzərdə tutmuram. Bilirəm ki, özü də buna heç vaxt razı olmaz. Adam istəsə, Azərnbaycanda “CBC Sport”dan daha səviyyəli 10 kanal açar, asanlıqla da reytinq yığar. Çünki o bu işi necə görmək lazım olduğunu bilir.

Biz Acun bəyin futbola marağından, daha doğrusu, onun futbol klubu almaq həvəsindən istifadə etməliyik. Vaxtilə Hafiz Məmmədov İspaniya, Fransa və İngiltərədə klub alırdı. İndi Acun bəy belə alış-verişdədi. Yəqin sizin də xəbəriniz var ki, İngiltərənin çempionşip təmsilçisi “Hall Siti”ni alıb. Hətta gürcü çalışdırıcı Şota Arveladzeni də ora baş məşqçi aparmışdı. Amma mütəxəssisin İngiltərədəki karyerası uğurlu alınmadı.

Heç “Hall Siti” də mövsümü yüksək səviyyədə keçirmədi. 24 klub arasında 15-ci olan Acunun komandası çıxış etdiyi liqanın ortababı sayılırdı. Çox güman ki, Acun da, onun komandası da yeni mövsümə daha iddialı hazırlaşacaq. Görünən odu ki, bu iş Acun bəyə də maraqlı gəlib. Belə olmasaydı, növbəti klubu almazdı. Bu yaxınlarda şəxsən özü açıqladı ki, İrlandiya premyer-liqasında çıxış edən “Şelburn”u da alıb. Özü də bu dəfə hədəf avrokuboklara qatılacaq, orda adından söz etdirəcək klub yaratmaqdı.

Nə qədər gec deyil, Acun bəyi ölkəmizə dəvət etməliyik. Canı canımızdan, qanı qanımızdan. Amma gedib İngiltərədə, İrlandiyada klub alır. Onların onsuz da futbola xərcləməyə pulları var. Bizim isə “Kəpəz”imiz sponsor gözləyə-gözləyə gözünün kökünü saraldıb.

FİF hər ayın əvvəli və sonu Şamaxıda toplantı keçirir, amma eyniadlı kluba sponsor tapa bilməyib. Buyurun, cənablar, sizə əla bir ideya verdim. Acun bəyi Azərbaycana çağırın, yubanmayın!

AMAL