"Ölkə futbolu düzgün sistemlə idarə olunmayıb. 15-20 il geri salıblar deyə, 5 futbolçumuzun mövsümdən sonra xarici klublara keçməsi qeyri-adi hadisə sayılır. Amma "Neftçi", "Qəbələ" və "Qarabağ" kimi klublarımızın, əsasən də ağdamlıların müntəzəm avrokubokların qrup mərhələsində oynaması daha çox futbolçumuzun xaricə getməsini şərtləndirməliydi. Təkcə "Qarabağ"ın uğurları bəs edirdi ki, əcnəbi seleksiyaçıların marağı artsın. Amma ölkə futbolundakı düzgün olmayan idarəçilik, qeyri-peşəkar fəaliyyət buna imkan vermədi. Yəni hər il 5-6 futbolçumuz Avropaya üz tutsa, heç olmasa, iki-üçü möhkəmlənib xaricdə qala, daha güclü liqalara keçid edə bilərdi. Həmçinin özünü doğruldanlara görə digər futbolçularımıza da maraq yaranar, ölkəmizə skautlar axışardı. Əsas odu ki, inamımızı itirməyək və bundan sonrasına baxaq. Fikrimcə, 5 futbolçumuzun legioner həyatına qədəm qoyması uğurlu alınacaq və ölkə xaricinə üz tutanların sayı artacaq".

"Bu, əlbəttə, yaxşı haldı və davam etməsini istəyərdik. Elə də uzaq olmayan keçmişdən nümunə çəkim. 2000-ci illərin əvvəlində millimiz yaxşı çıxış etməyə başladı. Güclü rəqibləri Bakıda məğlub edə bildi və futbolçularımıza maraq artdı. Hətta vaxt vardı ki, ölkə çempionatı doğru-dürüst keçirilmirdi. Ona görə xaricə üz tutanlar çox idi. Yığmaya dəvət alanların 80 faizi legioner həyatı yaşayanlar idi. Etiraf etmək lazımdı ki, son mövsümdə çempionatın səviyyəsində, komandalar arasında rəqabət artmışdı, idman prinsiplərinə də əməl olunmağa çalışılır. Bütün bunlar futbolçuların da inkişafına təsirsiz ötüşmür. Musa, Ramil, Cəlal, Coşqun, Vüsal və başqaları özlərini yaxşı tərəfdən göstərdilər və əcnəbi seleksiyaçıların diqqətini cəlb etdilər. Emin Mahmudovun da legioner həyatı yaşamaq şansı vardı, amma "Neftçi"də qalmağı üstün tutdu. Açığı, hazırda 5 futbolçunun sırasına kimlərinsə qoşulacağına inanmıram. Amma gedənlərin özlərini yaxşı tərəfdən göstərmələrindən də çox şey asılıdı. Məhz onların performansı sayəsində qış “transfer pəncərəsi”ndə daha 2-3 futbolçumuz xaricə gedə bilər. Bir sözlə, futbolçularımızın xaricdə oynamağa can atması ənənəsini inkişaf etdirməliyik".

"Mövsüm başa çatandan sonra 5 futbolçumuz müxtəlif ölkələrin çempionatına yollandı. Hazırda əsas məsələ buna sevinmək yox, onların özlərini necə doğruldacağıdı. Yəni yığma üzvlərinin üz tutduqları ayrı-ayrı çempionatlara uyğunlaşmalarından, tonusu saxlamalarından çox şey asılıdı. Elə də bir qayda yoxdu ki, 5 oyunçumuz legioner həyatına üz tutdu deyə, hər il bu yöndə ədədi və həndəsi silsiləylə artmalıyıq. Mən də istərdim ki, legioner həyatı yaşamağa qərar verənlər özlərini yaxşı tərəfdən göstərsinlər. Onların hər birinə uğurlar arzulayıram".