Dünya çempionatında cəmi 9 mərhələ arxada qalıb, ancaq indidən Maks Ferstappeni qələbə münasibəti ilə təbrik etmək olar.

"Football-plus.az" xəbər verir ki, bir pilot cari mövsümdə ardıcıl 5-ci, ümumilikdə 7-ci qələbəsini qazanırsa, başqa sözə, qənaətə ehtiyac qalmır. Niderlandlı Avstriyada bütün sessiyalarda ən yaxşı nəticəni göstərdi – sərbəst yürüşdə, əsas təsnifatda, sprint-yarışın təsfinatında və həlledici mərhələdə qalib gəldi. 2-ci yeri “Ferrari”nin pilotu Şarl Lekler, 3-cü yeri isə Maksın komanda yoldaşı Serxio Peres tutdu.

Karyerasında 42-ci dəfə fəxri kürsünün ən yüksək pilləsinə qalxan Ferstappen bu göstəricidə əfsanəvi Ayrton Sennanı (41) arxada qoyub 5-ci oldu. “Formula-1”də qələbə sayına görə rekord Lüis Hemiltona (103) məxsusdu. Sonrakı pillələrdə Mihael Şumaher (91), Sebastyan Fettel (53) və Alen Prost (51) qərarlaşıb.

Avstriya mərhələsini Ferstappen üçün özəl edən daha bir məqam var. Belə ki, mayın 7-də keçirilən Mayami “Qran-pri”sindən bəri dövrə liderliyi seriyası yaxalayan niderlandlı, nəhayət, 248-də dayandı. Avstriyada 24-cü dövrədə pit-stopa yaxınlaşan Maks liderliyi Leklerə təhvil verməli oldu. Ferstappenin seriyası uzunluğuna görə “Formula-1” tarixinə 3-cü nəticə kimi düşdü. Lider kimi keçilən dövrələrin sayına görə rekord Alberto Askariyə məxsusdu (1952 mövsümündə 305 dövrə), onun ən yaxın izləyicisi mərhum Ayrton Sennadı (1988 mövsümündə 264 dövrə).

ORXAN