Bu sözləri "Football-plus.az"a açıqlamasında "Səbail"in baş məşqçisi Şahin Diniyev deyib.
Onun sözlərinə görə komandanın formalaşdırılması istiqamətində qurulan plan sonuncu mərhələdədi:
"Yerli futbolçuların heyətə cəlb edilməsi prosesi artıq yekunlaşıb. İyulun 3-dən sonra legionlerin transferi ilə bağlı mərhələnin nəticələri açıqlanmağa başlayacaq".
Mütəxəssis futbolçu karyerasını bitirən Rahid Əmirquliyevlə klubda başqa işdə çalışması üçün danışıqların davam etdiyini bildirib:
"Rahidin rəhbərliklə görüşü hələ baş tutmayıb. Hansı yolu seçəcəyini bilmirik. Qəti qərarını açıqladıqdan sonra ictimaiyyətə məlumat verəcəyik".
Qeyd edək ki, "dənizçilər"in yay hazırlıq planı da bəllidi. Komanda məşqləri iyulun 1-dən 8-dək Bakıda keçirəcək. 7-də "Kəpəz"lə yoldaşlıq oyunu nəzərdə tutulub. İyulun 9-da Türkiyəyə yollanacaq paytaxt təmsilçisi 19-da "Alanyaspor"la qarşılaşacaqsa, 16 və 22-də üzləşəcəyi rəqiblər hələ bəlli deyil.
KƏNAN BAHADIR
