Premyer-liqanın son çempionu “Qarabağ”da işlər hələ ki qaydasında gedir.

Ağdamlılar hazırlığın Bakı mərhələsini başa vurub. Çempionlar Liqasının 1-ci təsnifat mərhələsindəki rəqib də bəllidi. Bu, Cəbəllütariqin “Linkoln Red İmps” klubudu. “Köhlən atlar” bu kollektivi üstələyə bilsə, 2-ci mərhələdə “Rakuv” – “Flora” cütünün qalibi ilə qarşılaşacaq. Bəs ilk rəqiblə bağlı hansı hazırlıqlar görülür? Qarşılaşma harda keçiriləcək? Rəhbərlik klubun güclənməsi istiqamətində hansı addımları atacaq? Klubla müqavilə müddəti bitən futbolçularla yeni anlaşmalar əldə edilib? Gördüyünüz kimi, “Qarabağ”la bağlı suallar çoxdu. Bunları aydınlaşdırmaq üçün klubun baş direktoru Əmrah Çəlikəllə əlaqə saxladıq.

- Çempionlar Liqasının 1-ci təsnifat mərhələsindəki rəqibiniz bəlli oldu. “Linkoln Red İmps”lə oyunlarla bağlı nə düşünürsüz?
- Rəqib Cəbəllütariqin ən köklü klubudu. Son illərin çempionudu. Mən də mətbuatda onlar haqda yazılanları oxuyuram. Bir çoxları rəqibi zəif komanda kimi qələmə verir. Lakin bu, bizi aldatmamalıdı. Bir ölkədə çempionat keçirilirsə, oranın qalibi ilə qarşılaşacağıqsa, həmin rəqibi ciddiyə almalıyıq. Texniki cəhətdən Qurban Qurbanov lazımi hazırlıq işlərini görəcək. Rəhbərlik olaraq biz də ona dəstək olmalıyıq. İndiki məqamda ancaq bunu söyləyə bilərəm.

- Bu rəqibi keçsəz, ya Polşanın “Rakuv”, ya da Estoniyanın “Flora” klubu ilə qarşılaşacaqsız. Potensial rəqibləriniz haqda nə deyə bilərsiz?
- Hazırda onlar haqda danışmaq doğru olmaz. Çünki hələ qarşıda “Linkoln Red İmps”lə oyunlar var. Əsas hədəfimiz ilk rəqibi keçməkdi. Bundan sonra başqaları haqda nəsə söyləmək olar. Yenə deyirəm, əvvəlcədən danışmağım düzgün deyil.

- “Linkoln Red İmps”i harda qəbul edəcəksiz? Bilirik ki, Tofiq Bəhramov adına Respublika stadionu təmirdədi. Bir müddət öncə mediaya açıqlamanızda Çempionlar Liqasının ilk iki təsnifat mərhələsindəki görüşlərinizi “Azərsun Arena”da keçirəcəyinizi demişdiz. İndi isə Bakı Olimpiya Stadionu variantı da var. Son qərar necə oldu?
- Görüşlərimizi Bakı Olimpiya Stadionunda keçirəcəyik. Son qərarımız belədi.

- Arenanın tam dolmamaq ehtimalı ilə bağlı hansısa narahatlığınız yoxdu ki?
- Hamımız istəyirik ki, stadion dolsun. İnşallah, azarkeşlərimizin görüşə marağı böyük olar. Amma əksər tribunaların dolacağını düşünürəm.

- Həmişə açıqlamalarınızda bildirmisiz ki, transfer məsələlərində Qurban Qurbanovla eyni fikirdəsiz. Yaxın günlərdə “Qarabağ” heyətinə yeni futbolçu cəlb edəcək?
- Hazırda yox. Heyətə yeni futbolçunun cəlb olunması hələ ki gündəmimizdə yoxdu. Yəni danışıqları yekunlaşdırdığımız futbolçu yoxdu.

- Klubla müqavilə müddəti bitən futbolçular da var. Maksim Medvedevlə yeni müqavilə bağladız. Qara Qarayevlə şərti razılaşmanız var idi. Rahil Məmmədov da müqavilə müddəti bitən futbolçulardan idi. Bu iki oyunçu ilə bağlı hansısa yenilik var?
- Düzdü, Qaranın hələlik birillik müqaviləsi var. Maksimlə bağlı rəsmi saytımızda məlumat vermişdik. Rahillə bağlı da anlaşma əldə etmişik. Onunla da hansısa problemimiz yoxdu. Yaxın günlərdə rəsmi məlumat veriləcək. Bundan əlavə, Qara Qarayev bizim balaca qardaşımızdı. Onunla hansısa müqaviləyə ehtiyac yoxdu. İstəyirik ki, Qara həmişəlik bizim oyunçumuz olsun.

İLKİN SULTANLI