Türkiyə Futbol Federasiyası gələn mövsüm Türkiyə çempionatında tətbiq olunacaq legioner limiti ilə bağlı yeni detalları açıqlayıb.

"Football-plus.az" xəbər verir ki, TFF limitlə bağlı qərarı hələ mayın ortalarında vermişdi. Klublara mövsümlük iştirak ərizəsinə maksimum 14 legionerin adını salmağa icazə veriləcək. Amma superliqa matçlarında bu legionerlərdən maksimum 8-i eyni anda meydanda olacaq. Yəni ötən mövsüm olduğu kimi ''8+3'' limiti qüvvədə saxlanılıb.

Yeni detal isə ondan ibarətdi ki, bundan sonra azərbaycanlı futbolçular Türkiyə çempionatında legioner sayılmayacaq!

Belə ki, klublara 14 legionerdən əlavə Azərbaycan, Qazaxıstan, Qırğızıstan, Özbəkistan və Türkmənistan vətəndaşı olan ən azı 1 futbolçunu da transfer etməyə icazə veriləcək. Bundan başqa Türkiyə vətəndaşı ola-ola Türkiyə yığmasında oynamaq hüququ olmayan və mavi karta sahib olan ən azı 1 futbolçunun da transferin icazə veriləcək. Onlar da legioner sayılmayacaq. Sonuncu kriteriyaya uyğun gələn futbolçu kimi ''Qalatasaray''lı Yusuf Dəmiri göstərmək olar.

Gənc oyunçu Türkiyə vətəndaşı olsa da, artıq Avstriya yığmasında debüt etdiyi üçün onun Türkiyə yığmasında oynamaq şansı yoxdu. Amma Yusuf bundan sonra legioner sayılmayacaq.

ƏLİ RAUFOĞLU