“Öz əlimizlə kuboku hədiyyə etdik”
Region Liqasının qalibinin adına Tovuz şəhər stadionunda aydınlıq gəldi. "Qusar" həlledeici oyunda "Çinar-Zəngilan"a 2:0 hesabıyla qalib gəldi.
Halbuki Zəngilan təmsilçisi oyuna daha yaxşı başlamışdı. Rəqibin azlıqda qalması və qapısına penalti təyin olunmasına rəğmən, zəngilanlılar bu fürsətdən yararlana bilmədi.
Komandanın 10 nəfərlə oynayan "Qusar"a uduzmasının səbəbi nə idi? "Football-plus.az" saytı olaraq bu sualı aydınlarşdırmaq üçün "Çinar-Zəngilan"ın baş məşqçisi Anar Dünyamalıyevlə əlaqə saxladıq:
"Oyuna yaxşı başladıq. Əks-hücum zamanı futbolçumuz təkbətək çıxdı, rəqib qırmızı vərəqə aldı. Daha sonra penalti qazandıq, amma bu fürsəti boşa verdik. Rəqib isə qazandığı 11 metrlik cərimə zərbəsini qaçırmadı. Bundan sonra təşəbbüs və üstünlük "Qusar"a keçdi. Onlar ikinci dəfə qapımıza yol tapdı. Çox zəif, hətta ən bərbad oyunumuzu oynadıq və uduzduq. Danışmaq çətindi. Öz əlimizlə kuboku hədiyyə etdik. Rəqib bizdən güclü oynadı və qalib gəldi.
Komandanı dəstəkləyən hər bir azarkeşimizə təşəkkür edirəm. Çox sağ olsunlar ki, bizi dəstəkləyirlər. İnşallah, növbəti mövsümdə çempion olarıq".
ABDULLA İSMAYILOĞLU
Digər xəbərlər
