MHL-də mövsümlərarası dövrün adi özəlliklərindən biri də məşqçi dəyişiklikləridi.

"Football-plus.az" xəbər verir ki, son günlərdə iki klubda bu mənada yenilik yaşanıb. Piter Laviolett “Reyncers”in baş məşqçi vəzifəsinə təyin olunub. Xəbəri ictimaiyyətə çatdıran Nyu-York klubunun saytı 58 yaşlı mütəxəssisin müqavilə müddətini açılqlamayıb. Klubun baş meneceru Kris Druri təyinatla bağlı belə deyib: “Piter komandamızın yeni baş məşqçisi olacağına görə sevinirik. Onun MHL-də çox zəngin iş təcrübəsi var, bir çox klubla uğurlar qazanıb. “Reyncers”i gələcəkdə nə gözlədiyi bizim üçün maraqlıdı”.

Xatırladaq ki, Laviolettin sonuncu komandası “Vaşinqton” olub. Amerikalı paytaxt klubunu 2020-ci ilin sentyabrından bu ilin aprelinə qədər çalışdırıb. “Reyncers” Laviolettin MHL-dəki 6-cı komandasıdı. Buna qədər yuxarıda adını çəkdiyimiz “Vaşinqton”la yanaşı, “Aylenders”, “Karolina”, “Filadelfiya” və “Neşvill”in də “sükanı arxasında” olub.

“Kalqari”ni isə gələn mövsüm Rayan Haska çalışdıracaq. 47 yaşlı mütəxəssis baş məşqçi postunda Derril Satteri əvəzləyib. Haska “Kalqari”nin klub sistemində 9 ildi çalışır. Son 5 mövsümdə baş məşqçinin yardımçısı olub və azlıqda oyunun qurulmasına görə məsuliyyət daşıyıb. “Fleymz”in 2022/23 mövsümündə Qərb konfransında 9-cu yeri tutmaqla pley-offa vəsiqə qazana bilmədiyini də xatırladaq. Əvvəli mövsümdə isə pley-offun 2-ci mərhələsində “Edmonton”a uduzub (1:4).

Bu arada daha bir komanda ilə bağlı xəbər var. MHL-in saytında yer alan xəbərə görə, milyarder Maykl Endlauer “Ottava”nın sahibi olacaq. Onun namizədliyini MHL-in başqa klublarının sahibləri də təsdiqləməlidi. “Ottava”nın Endlauerə 950 milyon dollara başa gələcəyi xəbər verilir. Onun “Monreal”ın həmsahibi və Ontario liqasında mübarizə aparan “Bulldoqs”un sahibi olduğunu da vurğulayaq. 57 yaşlı Endlauer nəqliyyat və logistika biznesi ilə məşhurlaşıb, onun şirkətinin əsas müştəriləri tibb sahəsi üzrə ixtisaslaşan müəssisələrdi.