Son mövsüm "Şamaxı"da özünü yaxşı tərəfdən göstərənlərdən biri də Fuad Bayramovdu. O, komandanın əsas heyət üzvü olmaqla yanaşı, meydanda sona qədər döyüşənlərdən idi. Sonuncu yeri tutduğuna görə "şirlər"in 1-ci diviziona düşməsi hələ rəsmi təsdiqini tapmayıb. Bütün futbolçular kimi, Fuad da AFFA İcraiyyə Komitəsinin iclasını gözləyir.

"Football-plus.az" olaraq 25 yaşlı müdafiəçi ilə gələcək karyerasıyla bağlı söhbət etdik.

- Yola saldığımız mövsümü özün və "Şamaxı" üçün necə xarakterizə edərdin?
- Düşünürəm ki, çox maraqlı çempionat oldu. Son illərin gözoxşayan mövsümü arxada qaldı. Bütün oyunlar maraqlı və intriqalı keçdi. Axırıncı yeri tutmağımıza baxmayaraq, yaxşı mübarizə aparıb sona kimi mübarizəni davam edirdik. Məncə, "Şamaxı" kimi klubların olması Azərbaycan futbolunun inkişafına xeyirdi. Özümə gəlincə, yaxşı mövsüm keçirdim, təcrübə toplamağa çalışdım. Amma bu məni qane etmir. Daha da inkişaf edib məqsədlərimə catmalıyam.

- İcraiyyə Komitəsinin "Şamaxı"nın elitada qalmasıyla bağlı qərar verəcəyinə ümidlisən?
- Ümid edirəm ki, müsbət qərar verilər. Doğma rayonumun təmsilcisinin elitada qalmağını istəyirəm.

- Komanda 1-ci diviziona düşsə, heyətdə qalmağı düşünürsən?
- “Şamaxı”nın 1-ci divziona düşməsi rəsmiləşsə, rəhbərliklə danışıb, halallıq alıb premyer-liqa klublarından birində oynayacam. Zatən elitada çıxış etmək üçün çox əziyyət çəkmişəm. Ona görə yenidən diviziona qayıtmaq istəmirəm.

- Təkliflər var?
- Bəli, yerli və xarici klublardan təkliflər var. "Şamaxı"nın durumunun necə olacağını gözləyirəm. Ondan sonra qərar verəcəm.

- Bu yaxınlarda Yunanıstanın "Obera Sport" menecerlik şirkətiylə 2 illik müqavilə bağladın. Bu barədə danşardın...
- Fevralda müqavilə bağladıq. Qış təlim-məşq toplanışında Türkiyəyə gəldilər, söhbət edik və razılıq əldə olundu. Düşünürəm ki, mənim üçün xeyirli olacaq. "Obera Sport" çox yaxşı şirkətdi, legioner heyatı yaşamağıma da kömək edəcəklər. Hazırda mənimlə bağlı danışıq apardıqları klublar da var.
- Legioner həyatı yaşamağı düşünürsən?
- Əlbəttə, istəyirəm. Qarşımda duran əsas hədəflərdən biri ölkə xaricində oynamaqdı.

- Bu il "Şamaxı"da özünü yaxşı tərəfdən göstərən və performansını artıran futbolçulardansan. Amma yığmaya dəvət almadın. Ölkənin əsas komandasından dəvət gözləyirdin?
- Təbii ki, gözləyirdim və gözləyəcəm də. Həmişə bunun üçün çalışıb hazır olacam ki, dəvət alarkən milli komamdanı layiqincə təmsil edim.

- Yığmamız seçmə mərhələyə uğursuz başladı. Estoniyanı məğlub edəcəyimizə inanırsan?
- İyunun 17-də "Dalğa Arena"da keçiriləcək görüşdə millidən maksimum nəticə gözləyirəm. Komandaya uğurlar arzulayıram.

ABDULLA İSMAYILOĞLU