Vüqar Əsgərlinin “Şamaxı”dan getmək fikri yoxdu
"Şamaxı" ötən mövsüm 36 matçda 25 xal toplamaqla çempionatda sonuncu oldu.
İdman prinsipinə əsasən bölgə təmsilçisi 2023/24 "futbol ili"ndə 1-ci divizionda çıxış etməlidi. Lakin AFFA bu istiqamətdə yekun qərarını açıqlamayıb. Növbəti mövsümdə hansı liqada çıxış edəcəyini bilməyən klub bu üzdən hazırlığa başlamayıb. Heyətlə bağlı məsələlərə də aydınlıq gəlməyib. Digər tərəfdən, həm rəhbərlik, həm baş məşqçi, həm də komanda ilə bağlı fərqli iddialar səslənir. Mətbuatdan gah İdarə Heyətində dəyişikliklərin olduğunu, gah komandanın dağıldığını, gah da baş məşqçi Vüqar Əsgərlinin işinə davam etmək istəmədiyini oxuyuruq. Tez-tez gündəmə gələn isə sonuncu iddiadı. Deyilənlərə inansaq, çalışdırıcı artıq klubla yolları ayırıb və özünə yeni iş yeri axtarır.
"Football-plus.az" olaraq iddialara aydınlıq gətirmək məqsədilə "Şamaxı"nın baş meneceri Kamran İsmayılovla əlaqə saxladıq:
"Mətbuatda "Şamaxı" ilə bağlı həqiqətə uyğun olmayan xəbərlərlə tez-tez rastlaşıram. Mövcud durum dezinformasiyaların yayılmasına, fikir ayrılığına səbəb olur. Ümid edirik ki, AFFA İcraiyyə Komitəsinin iclası yaxın günlərdə son sözü deyər. Hazırda növbəti mövsüm üçün heç bir addım atılmayıb. Bunun da günahkarı bizik. Asılı haldayıq. Hələ ki gözləmə mövqeyindəyik. Vüqar Əsgərlinin məsələsinə gəlincə, baş məşqçi kimi davam edib-etməyəcəyi ilə bağlı nə rəsmi, nə də qeyri-rəsmi danışığımız olub. Deyə bilmərəm, qalacaq, yoxsa gedəcək. Futbolda hər an hər şey ola bilər. Təkcə "Şamaxı"da yox, bütün klublarda belədi".
Bu söhbətə son qoymaq üçün Vüqar Əsgərlini də aradıq:
“Klubla müqavilə müddətinin başa çatmasına hələ 1 il qalıb. Hər kəs kimi, biz də AFFA İcraiyyə Komitəsinin iclasını gözləyirik. Yekun qərardan sonra klubdaxili iclas olacaq. Hər mövzü təfərrüatı ilə yalnız orda müzakirə ediləcək. 1-ci diviziona düşsək belə, rəhbərliklə şərtləri razılaşdırıb “Şamaxı”da qalmaq istəyərəm. Təbii ki, bunda rəhbərlik də maraqlı olmalıdı”.
KƏNAN BAHADIR
Digər xəbərlər
