“Barselona”nın növbəti maliyyə ili ilə bağlı planı hazırdı. İspaniya klubu maaş fondunu daha da azaltmağı zəruri sayır.


“Football-plus.az” xəbər verir ki, “Sport” qəzetinin məlumatına görə, rəhbərlik maaş üzrə illik xərcləri təxminən 450-470 milyon avroya qədər endirməyi planlaşdırır. “Barselona” bu planı növbəti mövsümün əvvəlinə qədər reallaşdırmaq niyyətindədi.

Qeyd edək ki, 2021/22 mövsümündə “Barselona”nın maaş ödənişinin həcmi 656 milyon, 2022/23 mövsümündə isə 530 milyon avro olub. Xərclərin azalması Serxio Buskets, Xordi Alba, Xerard Pike və Memfis Depayın komandadan getməsi ilə bağlıdı. Növbəti addım isə başqa klublara icarəyə verilən futbolçularla yolları ayırmaq və daha 50 milyon avroya qənaət etməkdi. Getmək ehtimalı yüksək olanlar Kleman Lanqle, Samuel Yumtiti, Serjinyo Dest, Aleks Kollado və Qustavo Mayadı. Klubun qadınlardan ibarət komandasının, həmçinin basketbol, ​​həndbol və futzal komandalarının maaşları üçün sərf edilən 90 milyon avronun bir hissəsinin azaldılması da nəzərdə tutulub.

Xatırladaq ki, “Barselona" son 2 mövsümdə maliyyə qaydalarını pozduğuna, maaş limitini aşdığına görə transfer etdiyi futbolçuları La Liqada qeydiyyatdan keçirməkdə problem yaşamışdı.