Tərlan Əhmədovla yolları ayıran “Kəpəz” dünən ictimaiyyətə yeni baş məşqçini təqdim etdi.

Növbəti mövsümdə “sarı-göylər”i Azər Məmmədov çalışdıracaq. Yeni baş məşqçinin qarşısına nə məqsəd qoyulub, klubda hansı dəyişikliklər olacaq? Bu və bizi maraqlandıran başqa suallara cavab tapmaq üçün “Kəpəz”in İdarə Heyətinin rəhbəri İlqar Nadiri ilə söhbətləşdik.

- Öncə Tərlan Əhmədovla bağlı sualı cavablamağınızı istərdik. Ounla şərtləri razılaşdıra bilmədiz, yoxsa başqa səbəblər var?
- Detallara varmaq istəmirəm. Hər şeyə görə Tərlan müəllimə “çox sağ ol” deyirəm. Gələcək karyerasında ona uğurlar arzulayıram. Bu gün üçün seçimimiz Azər Məmmədov oldu. Onunla görüşüb danışdıq, komandanın qarşısına qoyulan məqsəd barədə fikir mübadiləsi apardıq. Düşüncələrimiz üst-üstə düşdüyündən onu “sükan arxasına” dəvət etdik.

- Məmmədovdan başqa namziədlər var idi? Bildiyimiz qədər Aftandil Hacıyevlə də söhbətiniz olub...
- Afdandil müəllimlə əvvəlcədən isti münasibətimiz var. Onunla imkan olanda görüşüb bəzi məsələrlər barədə müzakirələr aparırıq. O dəyərli mütəxəssislərimizdən biridi. Lakin onun başqa variantının olduğunu bilirəm. Başqa heç kimlə əlaqə saxlamamışıq.

- Ötən mövsüm gəncəli azarkeşlərin böyük hissəsi “Gəncədə gəncəlilər işləməlidi” söyləyirdilər. Bu məqam seçiminizə təsir göstərdi?
- Bu yanaşma ilə heç vaxt razılaşmamışam. Azər müəllim ötən mövsüm Bakı klubunda çalışırdı. Belə çıxır ki, Bakıda da ancaq bakılılar işləyə bilər? Bu kökündən yanlış fikirdi. Azər müəllimin futbolçu karyerasını, təcrübəsini, futbola baxışını nəzərə alıb onu baş məşqçi postuna dəvət etdik. Ümid edirəm ki, inamımızı doğruldacaq.

- Sizə elə gəlmir ki, növbəti mövsüm “Kəpəz” üçün çətin olacaq? Premyer-liqanın digər təmsilçiləri ilə müqayisədə sponsorunuz yoxdu. Bundan başqa, heyət də, demək olar ki, dağılıb. Aparıcı oyunçuların bir çoxu düşərgəni tərk edib.
- Əlbəttə, çətin olacaq. Sponsorsuz komanda üçün həmişə çətindi. Növbəti, ondan sonrakı mövsümdə də çətinlik çəkəcəyik. Onu düz vurğuladız ki, elitanın digər komandalarının sponsorları var. Sponsor olmayınca, çətinliklə üzləşəcəyik.

- Yeri gəlmişkən, sponsor məsələsində hansısa yenilik var?
- Hələ ki yenilik yoxdu. İdarə Heyətinin son toplantısında bu məsələ həmişəki kimi yenə gündəmdə idi. Qərara alındı ki, bu yöndə çalışmalar davam etdirilsin, hər kəs bu işdə fəal olsun. Sponsor olmasa, inkişaf mümkün deyil.

- Son günlər komandanın sabiq baş məşqçisi Yaşar Vahabzadənin Gəncəyə dönəcəyi, akademiyanın rəhbəri olacağı barədə söz-söhbət dolaşır. Buna münasibət bildirməyinizi istərdik.
- Açığı, mən də bu xəbəri mətbuatdan oxumuşam. Ancaq belə bir plan yoxdu.

- Söhbətimizin əvvəlində qeyd etdiyimiz kimi, bəzi aparıcı futbolçular “Kəpəz”i tərk edib. Onların yaratdığı boşluğu doldurmaq çətin olmayacaq?
- Bu məsələyə baş məşqçi cavabdehlik daşıyır. Azər müəllimlə söhbətimizdə büdcəni təqdim etmişik. Ona uyğun da addımlar atılacaq. Baş məşqçimizin futbol fəlsəfəsinə, təcrübəsinə güvənirik. Ümid edirik ki, etimadı doğruldacaq.

- Komanda təlim-məşq toplanışını ölkə daxilində, yoxsa kənarda keçəcək? Bizdə olan məlumata görə, Türkiyəyə yollanacaqsız?
- Bu məsələ də baş məşqçinin səlahiyyəti çərçivəsindədi. Onun planına uyğun addım atılacaq. Bayaq söylədiyim kimi, büdcəni ona təqdim etmişik. Azər müəllim büdcəyə uyğun heyət formalaşdıracaq, toplanış təşkil edəcək. İmkan olarsa, komanda xaricə yollanacaq, olmayacaqsa, yeni mövsümə ölkə daxilində hazırlaşacaq.

- Stadion və qazonla bağlı da məlumat verərdiz. Yeni mövsümə yenə qəzalı tribunalarla gedəcəksiz?
- Ot örtüyü düzəlib. Yaxın vaxtlarda ideal vəziyyətdə olacaq. Tribunalara gəlincə, hələ bir yenilik yoxdu. Gəncədə futbol çox sevildiyindən balaca, daha dəqiq desəm, tutumu az olan arenalara sığına bilmərik. Bizə ən azı indiki kimi yeni stadion lazımdı. Bu yöndə isə hələ ki yeni xəbər yoxdu.

RƏŞAD