“Denver” fərqi artırdı, Makqreqor kobudluq etdi
MBA-da final seriyasının 4-cü oyunu da arxada qaldı.
“Football-plus.az” xəbər verir ki, “Denver” inamlı qələbə sayəsində “Mayami” ilə seriyada hesabı 3:1 etdi. Qaliblərin heyətində Aaron Qordon 27 xalla yadda qaldı, Nikola Yokiç isə dabl-dabl etdi. 5-cü oyun bu gün səhər saatlarında keçirilib.
“Denver”in baş məşqçisi Maykl Melounun oyunsonrası fikirləri:
“Hələ heç nə etməmişik. Çempion olmaq üçün daha bir oyunda qalib gəlməliyik. Ancaq oyunçularım sınağa hazırdı, tam köklənmə var”.
“Mayami”nin baş məşqçisi Erik Spoelstra isə hələ də inamını itirməyib:
“Qeyri-adi dərəcədə rəqabətədavamlı komandamız var. Hər şeyi öz əməyimizlə etmişik, yenə də belə olmalıdı. İndi qarşıda duran əsas vəzifə bu seriyanı Mayamiyə qaytarmaqdı. Hər şey çox sürətlə dəyişə bilər”.
Yeri gəlmişkən, 4-cü oyunda daha bir maraqlı hadisə baş verdi. UFC versiyası üzrə sabiq dünya çempionu Konor Makqreqor “Mayami”nin maskotuna sarsıdıcı iki zərbə endirdi. O, fasilədə parket üzərinə çıxaraq guya maskotla əyləncəli döyüş təşkil etdi. Amma 34 yaşlı irlandiyalı çox kobud hərəkətlə yadda qaldı. Maskota necə zərbə vurdusa, həmin kişi tibbi yardım üçün xəstəxanaya müraciət etdi. Belə yerdə deyiblər ki, qozbeli ancaq qəbir düzəldə bilər!
10 iyun
Mayami – Denver 95:108 (21:20, 30:35, 22:31, 22:22)
Seriyada hesab – 1:3.
