MBA-da 1/4 final seriyaları gərgin mübarizə şəraitində davam edir.

"Football-plus.az" xəbər verir ki, srağagün “Nyu-York” “Mayami”, “Qolden Steyt” “Leykers” ilə seriyada fərqi azalda bildi. Bu arada MBA 2022/23 mövsümünün yekunlarına əsasən rəmzi komandaları açıqlayıb. İlk “5-liy”ə bu basketbolçular düşüb: Şey Gilces-Aleksander (Oklahoma-Siti), Luka Donçiç (Dallas), Ceyson Teytum (Boston), Yannis Adetokunbo (Miluoki), Coel Embiid (Filadelfiya 76). 2-ci rəmzi komandaya Stefen Karri (Qolden Steyt), Donovan Mitçell (Klivlend), Cimmi Batler (Mayami), Ceylen Braun (Boston) və Nikola Yokiç (Denver) salınıb. Nəhayət, 3-cü “5-liy”ə Domantas Sabonis (Sakramento), Culius Rendl (Nyu-York), Lebron Ceyms (Leykers), Demian Lillard (Portlend) və De'Aaron Foks (Sakramento) düşüb.

“Memfis”in ulduz oyun qurucusu Ca Morent isə mövsümün yekunlarına görə tərtib olunan üç yığmanın heç birində yer almadığına görə əlavə 39 milyon dollar qazanmaq imkanını itirib. O, ötən ilin yayında klubla beşillik, dəyəri 192,2 milyon dollar olan yeni müqavilə bağlayanda şərtlərdən biri də belə idi ki, rəmzi yığmaya düşəcəyi təqdirdə müqavilənin ümumi məbləği 230 milyona çatacaqdı.

Dünən Qərb konfransında yarımfinal seriyalarından biri başa çatdı. 6-cı oyunda “Finiks”i məğlub edən “Denver” finalda rəqibini gözləyir. “Naqqets”in rəqibi “Qolden Steyt” – “Leykers” seriyasının qalibi olacaq. “Denver”in “Finiks” üzərindəki qələbəsində tripl-dabl edən Nikola Yokiçin əməyi böyükdü.

1/4 final
11 may
Nyu-York – Mayami 112:103 (14:24, 36:23, 34:27, 28:29)
Seriyada hesab – 2:3.
Qolden Steyt – Leykers 121:106 (32:28, 38:31, 23:23, 28:24)
Seriyada hesab – 2:3.
12 may
Filadelfiya 76 – Boston 86:95 (22:29, 21:21, 30:21, 13:24)
Seriyada hesab – 3:3.
Finiks – Denver 100:125 (26:44, 25:37, 25:22, 24:22)
Seriyada hesab – 2:4.