Fevralın 14-də “Konyaspor” Mahir Emrelini Zaqreb “Dinamo”sundan mövsümün sonuna qədər icarəyə götürdü. Üstəlik Türkiyə klubu müqavilə müddəti 2026-cı ilin yayına qədər olan futbolçunu birdəfəlik transfer etmək hüququna da malik idi. Lakin bu hələ ki baş verməyib.

Mahir iki gün öncə rəsmi hesabında “hər şey üçün təşəkkürlər, “Konyaspor” sözlərini yazaraq klubla vidalaşdı. 4 aya yaxın superliqa təmsilçisinin heyətində olan həmyerlimiz nə ilə yadda qaldı? Gəlin, statistikaya nəzər yetirək.

“Konyspor” hücumçunun transferindən öncə keçirdiyi son 4 oyunda xalsız qalmış, bunların 3-də qol da vura bilməmişdi. Azərbaycanın adlı-sanlı futbolçusunu heyətə qatmaqla vəziyyətdən çıxış yolu tapdıqlarını düşünürdülər. Mətbuatda yayılan xəbərlərdə “Konyaspor”un ən çox ümid bəslədiyi futbolçu” kimi adından bəhs olunan Mahirin fotoları manşetləri bəzəyirdi.

Oynamaq üçün darıxdığını və mübarizəyə hazır olduğunu deyən futbolçu "Afyonspor"la yoldaşlıq matçına (5:0) start heyətində başlasa da, 2-ci hissədə əvəzləndi. Martın 5-də isə rəsmi debütü reallaşdı. Evdə "Girəsunspor"a qarşı keçirilən superliqanın 24-cü turunun oyununda (0:0) əsas heyətdə meydana çıxsa da, 56-cı dəqiqədə Robert Muriçlə əvəzləndi. 26-cı turda “Qalatasaray”a (2:1) qarşı start heyətində müarizə aparan futbolçu 15-ci dəqiqədə sarı vərəqə ilə cəzalandı və 79-cu dəqiqədə yerini Oğulcan Ulquna verdi. Mahir sözügedən oyunda zədələndiyi üçün məşqlərə martın sonlarında başladı. 27-cı turda “Umraniyəspor”la oyuna (2:2) da ilk “11-lik”də başlayan futbolçu 67-ci dəqiqədə yerini Bruno Paza verdi. Onun “Konyaspor”da 4-cü dəfə meydana çıxması “Antalyaspor”la oyuna (1:1) təsadüf etdi. Bu dəfə 66-cı dəqiqəyə qədər ehtiyat oyunçular skamyasında şansını gözlədi. Forvard 30-cu turun “Adana Dəmirspor”la matçında (1:2) 41-ci dəqiqədə ilk qolunu vursa da, 60-cı dəqiqədə Muriçlə əvəzləndi. “Kasımpaşa” (2:1) ilə növbəti oyuna isə 39-cu dəqiqədə Muriçi əvəzləməklə qoşuldu. Mahir “Trabzonspor”la matçın (2:1) da iştirakçısı oldu - 46-cı dəqiqədə Konrad Miçalakın əvəzinə meydana çıxdı və sonadək oynadı. Hətta 71-ci dəqiqədə sarı vərəqə də aldı. 33-cü turun “Kayserispor”la oyunu da milli üzvü üçün əlamətdar olmadı. Start heyətində 56 dəqiqə “döyüşən” Mahir yenə əvəzləndi. O, konyalıların səfərdə "Alanyaspor"la (3:0) qarşılaşmasında start heyətində yer aldı və ilk dəfə doğma mövqeyində - hücumun mərkəzində çıxış etsə də, 6 balla komandanın ən zəif oyunçusu oldu. 63-cü dəqiqədə Diufla əvəzləndi. 36-cı turda “Konyaspor” səfərdə “Sivasspor”la (0:1) qarşılaşdı. Start heyətində meydana çıxan Mahir 46-cı dəqiqədə əvəzləndi. Komandası 37-ci turda "Fatih Karagümrük"ü qəbul etdi ki, milli üzvü bu dəfə 63-cü dəqiqədə meydana çıxdı. Nəhayət, superliqanın son turunda, “Beşiktaş”la matçda (3:3) 46-cı dəqiqədə meydanda göründü. 1 dəqiqə sonra başla komandasının 2-ci, yəni bərabərlik qolunu vurdu.

Bir sözlə, Mahir Türkiyə superliqasında 12 matçda çıxış etdi. Ümumilikdə 621 dəqiqə top qovan hücumçu cəmi 2 qolla yadda qaldı, məhsuldar ötürmə müəllifi olmadı.

“Konyaspor”un yeni mövsüm üçün transfer siyahısında adının olub-olmadığı dəqiq deyil. Yalnız baş məşqçi Aleksandar Stanoyeviçin rəhbərliyə təqdim edəcəyi hesabatdan sonra bu məsələyə aydınlıq gələcək. Rəqəmlərə inansaq, hücumçunun Türkiyə macərası, sadəcə, özü üçün faydalı olub.

“Konyaspor”un bəzi hallarda Mahirdən razılıq etdiyini eşitsək də, istədiyini ala bilmədiyi bəllidi. Bəs futbolçu özü necə düşünür? Onun “Anadolu bu gün” nəşrinə mövsümü dəyərləndirərkən dediklərini dinləyək: