Ötən mövsümü 3-cü pillədə tamamlayan ''Konyaspor'' yenidən məşqçi dəyişikliyinin astanasındadı.

"Football-plus.az"ın məlumatına görə, rəhbərlik yanvarın ortalarında son dönəmlərdəki uğurlu nəticələrin baş memarı İlhan Palutla qalmaqallı şəkildə vidalaşmışdı. Səbəb kimi məşqçinin aqressiv xarakteri, oyunçularla düzgün ünsiyyət qura bilməməsi və gənc oyunçulara şans verməməsi göstərilmişdi. Amma Palutu əvəzləyən Aleksandar Stanoyeviç o qədər bərbad nəticələr əldə edir ki, artıq onun istefaya göndəriləcəyi haqda xəbərlər yayılıb.

''Konyaspor'' bu məşqçi ilə həm kubokda penaltilər seriyasında uduzaraq mübarizəni dayandırıb, həm də 4 superliqa oyununun hamısında məğlub olub. Stanoyeviç ilk 4 çempionat oyunundan həm xalsız, həm də qolsuz ayrılan ilk mütəxəssis kimi mənfi mənada adını klub tarixinə yazdırıb! ''Konyaspor''da icarə əsasında həmyerlimiz Mahir Əmrəli də top qovur. Düzdü, yığmamızın üzvü hələ ki, rəsmi oyunlarda debüt etməyib.

Bu arada Türkiyə mətbuatının yazdığına inansaq, Mahirin yeni çalışdırıcısı Sərgən Yalçın ola bilər. Belə ki, ''Konyaspor'' rəhbərliyi bu mütəxəssislə danışıqlara başlayıb. Yalçın 2021-in dekabrında ''Beşiktaş''dan ayrıldıqdan bu yana təxminən 15 aydı, futboldan kənardadı. Özü də Konya 50 yaşlı məşqçiyə yaxşı tanış olan şəhərdi. Sərgən daha öncə 2017/18-in 2-ci dövrəsində ''Konyaspor''u çalışdırıb.