Mahir Emreli karyerasını Türkiyədə davam etdirəcək. Zaqreb "Dinamo"sunun 26 yaşlı hücumçusu Xorvatiyanı tərk edərək qardaş ölkəyə yollanıb. Türkiyə mətbuatının məlumatına görə, millinin forvardı artıq Konya şəhərindədi və dünən tibbi müayinədən keçəndən sonra “Konyaspor”la müqavilə bağlayıb. Mahir superliqa klubunun heyətində 6 aylıq icarə əsasında çıxış edəcək.

Onun keçidinin detalları da bəlli olub. İddiaya görə, Konya klubu zəlzələ ilə bağlı bu transferi sosial şəbəkə hesablarında açıqlamayacaq. Həmçinin bildirilib ki, "Konyaspor" onu yalnız Türkiyədəki çıxışı uğurlu olacağı halda yayda birdəfəlik transfer edəcək. Mahirin isə, bilindiyi kimi, "Dinamo" ilə 2026-cı ilin iyununa kimi müqaviləsi var.

Məsələ ilə bağlı redaksiyamıza maraqlı informasiya daxil olub. Sən demə, futbolçunun “Konyaspor”a keçidinin səbəbkarı İbrahim Şehiçdi. Bosniyalı qolkiper Mahiri adı çəkilən komandaya gəlməyə inandırıb. Hücumçu ilə “Antalyaspor” da yaxından maraqlanırmış. Emrelinin meneceri onun bu kluba icarəyə verilməsinin tərəfdarı imiş. Lakin işlər sonradan fərqli məcrada davam edib. Belə ki, “Konyaspor” superliqada mövsüm ərzində 24 qol vurub, 22-ni buraxıb. Bunlardan 7-nə Mamadu Diof imza atıb. 8-ci pillədə qərarlaşan komandanın serbiyalı məşqçisi Aleksander Stanoyeviç rəhbərlikdən yeni hücumçu tələb edib. Sehiç də Mahirin kollektivə xeyir verəcəyini çalışdırıcıya bildirib. Stanoyeviç bir qədər əlaqələrindən istifadə etdikdən sonra keçid razılaşdırılıb.

“Dinamo”nun çalışdırıcısı Ante Çaçiç isə klubun rəsmi saytına açıqlama verib: "Emrelinin yazda mümkün qədər çox oyun keçirməsinin onun üçün daha yaxşı olacağını düşündük. Bu səbəbdən Türkiyə klubuna transferinə razılıq verdik".

İLKİN SULTANLI