Deyəsən, “Qalatasaray” Tükiyədə bu yayın növbəti transfer bombasını partlatmaq istəyir.

Əvvəlcə Seferoviçi, sonra Mertensi transfer edən, üstəlik Qomis kimi hücumçusu da olan İstanbul nəhəngi indi də diqqətini PSJ-nin ulduzu Mauro İkardiyə yönəldib.

“Cim-Bom” rəsmiləri argentinalı forvard ilə əlaqə saxladıqdan sonra məlum oldu ki, İkardi heç də Türkiyədə oynamağın əleyhinə deyil! Bundan başqa, 29 yaşlı futbolçunun meneceri və həyat yoldaşı Vanda Nara da Tükiyəyə gəlməyin tərəfdarıdı. Bu xəbəri əvvəlcə Fransanın “RMC Sport” kanalı ortaya atdı. Daha sonra italiyalı jurnalist Nikola Skira da danışıqların davam etdiyini və “Qalatasaray” rəsmilərinin keçidin müsbət yekunlaşacaqlarına inandıqlarını yazdı. Əslində “Aslan” “Torino”dan ayrılan və azad agent statusuna malik Andrea Belottiyə daha çox maraq göstərirdi. Amma təcrübəli forvard İtaliyanı tərk etmək istəmədi və hazırda “Roma” ilə danışıqlar aparır. Belotti variantı alınmadıqdan sonra istanbullular diqqəti İkardiyə yönəltdilər. “Qalatasaray” İkardinin illik məvacibinin 3 milyon avroluq (xarici mənbələrdə 4 milyon avro qeyd olunub) hissəsini üzərinə götürməyə hazırdı.

Məşhur forvardın Parısdə illik qazancı 8 milyon avrodu. Bu rəqəm bonuslarla birlikdə 10 milyon avroya çatır. PSJ hələ bu təklifə cavab verməyib. Bu transferdə “Qalatasaray”ın xeyrinə olan bir neçə məqam var. Avropanın bir çox ölkəsində yay transfer dönəmi bu ayın sonunda başa çatacaq. Türkiyədə isə “pəncərə” sentyabrın 8-də bağlanacaq. Baundan başqa, PSJ-nin idman direktoru Luiş Kampuşun da “Qalatasaray”la çox gözəl münasibətləri var. Axı portuqaliyalı futbol adamı ötən mövsümün gedişində qısa müddət də olsa, məhz “Cim-Bom”da işləmişdi. Bir məqam dəqiqdi ki, İkardi bu mövsüm PSJ-nin planlarına daxil deyil. Bu ayın sonuna qədər o, “böyük beşlik” ölkələrindən birinə yollanmasa, Mauronun Türkiyəyə gəlmək ehtimalı artacaq. Ən son xəbərlərdə qeyd olunur ki, Vanda Nara İkardinin xidmətini “Real”a təklif edib. Hətta argentinalı Madrid nəhəngində oynamaq üçün məvacibinin yarıbayarı azalmasına da razıdı.