Deyəsən, futbol dünyasının ən populyar cütlərindən olan Mauro İkardi ilə Vanda Naranın yolu artıq birdəfəlik ayrılmaq üzrədi.

Football-plus.az xəbər verir ki, İkardi mövsümün əvvəlində “Qalatasaray”a gələndən bəri onun həm meneceri, həm də həyat yoldaşı olan Nara ilə gah ayrılmağına, gah da barışmağına aid saysız-hesabsız xəbər peyda olmuşdu. Bir müddət öncə Vanda özü artıq boşanmaq üzrə olduqlarını dilə gətirmişdi. Mauro bundan sonra da barışmağa cəhd edərək xanımı ilə Maldiv adalarına istirahətə yollanmışdı. Bu üzdən budəfəki boşanma xəbərlərinin də yalan olacağını düşünənlər az deyildi. Amma bu dəfə məsələ həqiqətən ciddidi. Onların işi məhkəmədə həll olunacaq. Argentinanın “Ciudad Magazin” nəşrinin yazdığına inansaq, Nara keçmiş həyat yoldaşından çox böyük pullar “qoparmaq” niyyətindədi. Söhbət təxminən 100 milyon dollara bərabər olan daşınmaz əmlakdan və digər şeylərdən gedir. Vanda onların birlikdə olduğu müddətdə, yəni 8 illik dönəmdə topladıqları mal varlığının, eləcə də İkardinin karyerası ərzində qazandığı məbləğin yarısının ona qismət olmasını istəyir. Jurnalist Estefi Berardinin məlumatına görə İkardi Naraya 20 milyon dollar təklif edib. Yəni məşhur futbolçu məhkəməyə çıxmadan öz aralarında razılaşmağı təklif edib. Vandanın buna necə cavab verdiyi bilinmir. Amma məhkəmə istənilən halda baş tutacaq. Çünki onların iki qız övladı var. Bu uşaqların hansı valideynin yanında qalacağına, eləcə də alimentin həcminə məhz məhkəmə qərar verəcək.

Qeyd edək ki, İkardinin gələcək taleyi də qeyr-müəyyəndi. O, müqavilə ilə PSJ-yə məxsusdu və “Qalatasaray”da icarə əsasında forma geyir. Başqan Dursun Özbək son açıqlamasında etirf edib ki, İkardini daimi əsasda transfer etməyə çalışsalar da, bu, hələlik mümkün deyil. Çünki PSJ istanbullulardan astronomik məbləğ tələb edir. “Sarı-qırmızılar”ın İkardini yenidən icarəyə götürmək təklifini də PSJ bəyənməyib. Onu da vurğulayaq ki, hazırda zədəli olan 29 yaşlı futbolçunun hələ 2 həftə də komandadan uzaq qalacağı gözlənilir.