Yüngül çəkidə sabiq müvəqqəti çempion Toni Ferqyuson (25-8) sərxoş vəziyyətdə maşın idarə etmək ittihamı üzrə özünü təqsirli bilməyib.

"Football-plus.az" xəbər verir ki, Ferqyuson mayın 7-də gecə saat 2 radələrində gücə klubunun yaxınlığında dayanmış vəziyyətdə olan iki avtomobillə toqquşaraq yük maşınını çevirdiyinə görə həbs olunub. Hadisə yerinə gələn polis nəfərlərinin alkoqol testindən keçmək tələbindən imtina etdiyinə görə təcridxanaya aparılıb.

Polis hesabatına inansaq, Ferqyuson təhqiqat dövründə dinib-danışmayıb, baxmayaraq ki, qəza zamanı heç bir zədə almayıb. Ardından girov müqabilində azadlığa buraxılıb. Kaliforniyada sərxoş vəziyyətdə nəqliyyat vasitəsini idarə etməklə bağlı ittiham, adətən, 1000 dollara qədər cərimə, həmçinin alkoqol asılılığından müalicə və təhsil kursları ilə yekunlaşır.

Ferqyusonun hesabında hazırda 5 oyunluq məğlubiyyət seriyası var. O, sonuncu dəfə ötən il sentyabrın 10-da Las-Veqasda keçirilən döyüşün 4-cü raundunda Neyt Diasa uduzub.

Peşəkar boks dünyası ilə bağlı daha bir xəbər var. WBA, IBF və WBO versiyaları üzrə superağır çəkinin çempionu Aleksandr Usik (20-0) superağır çəkidə sabiq mütləq dünya çempionu Mayk Taysonla (50-6) söz davasına çıxmayıb. Əfsanəvi boskçu bir müddət əvvəl Usikin superağır çəkidə WBC çempionu Tayson Füri (33-0) ilə mümkün döyüşdə uduzacağını proqnozlaşdırıb. Usik isə ona belə cavab verib: “Mayk, sən böyük əfsanəsən, möhkəm kişisən. Vəssalam”.

Xatırladaq ki, Usik və Füri bir neçə ay ərzində birləşdirici döyüşlə bağlı danışıq aparsalar da, sonda razılığa gələ bilməyiblər.