İyunun 13-dən etibarən yeni mövsümün hazırlıqlarına start verən, Çempionlar Liqasının 2-ci təsnifat mərhələsi çərçivəsində Kiyev ''Dinamo''suna qarşı keçirəcəyi oyunlara hazırlaşan ''Fənərbaxça'' Jorje Jezuşun başçılığı altında ağır məşqləri davam etdirir.

Bu arada portuqaliyalı mütəxəssisin kluba maraqlı bir cəza sistemi gətirdiyi məlum olub. Jezuş əvvəlki klublarında olduğu kimi ''sarı-lacivərdlilər''də də oyunçuların fiziki durumunu ciddi önəm verir.

Az qala hər məşqdən öncə oyunçuların çəkisi yoxlanılır. Artıq çəki məsələsinə qarşı çox həssas olan ünlü məşqçinin gətirdiyi yeni sistemə əsasən futbolçular mövsüm ərzində hər 1 kq əlavə çəkiyə görə 100 avro pul cəzası ödəmək məcburiyyətində qalacaqlar. Çəki yoxlanışından Jezuş özü də daxil olmaqla məşqçilər korpusu da keçmək məcburiyyətindədi. Hətta Jezuşun öz çəkisi də artacağı təqdirdə o da bu məbləği ödəməli olacaq. Bu cəzalar mövsüm ərzində yığılacaq və sonda toplanılan məbləğdən klubun işçilərinə hədiyyələr alınacaq.